Bilboko Auzo Elkarteen Federazioak mobilizazioak egin ditu ostegun honetan hiriko hainbat osasun-zentrotan, osasun publikoaren alde.

Aipatutako federazioak ohar batean adierazi duenez, pandemiak mahai gainean jarri zuen zainketen eta osasun mentalaren garrantzia. Ildo horretan, urriaren 10a Osasun Mentalaren munduko eguna izan zela gogorarazi du, baina, salatu duenez, «ezer gutxi zegoen ospatzeko»; izan ere, psikiatrarik, psikologo klinikorik, osasun mentalean espezializatutako erizaintzako langilerik ez egotea, oraindik ere, «gai-zerrendan dago».

Gainera, ohartarazi duenez, Osakidetzak «gaur egun dauden osasun mentaleko hiru sareak desegin nahi ditu; plantilla propioa, aurrekontu propioa eta antolaketa propioa duten sare horiek beste ESI batzuen barruan sartzeko». Auzo elkarteen Federazioak esanetan, «berrantolaketa» hori, Osasun Itunaren ildoetako batean eztabaidatu zena, «pribatizazioei ateak ireki diezazkieke».

Hori dela eta, kalera atera dira berriro ere Bilboko bizilagunak ostegun honetan «osasun publikoa, hurbila eta kalitatezkoa» defendatzeko. Zehazki, Bilboko Auzo Elkarteen Federazioak deitutako elkarretaratzeak Uribarri, Abusu, Otxarkoaga eta Bilbo Zaharreko osasun-zentroen aurrean izan dira.