‘Gure Hitzak’ filma benetako gertaeretan inspiratutako doku-fikzioa da, Katalunian La Caseta Films etxeak ekoitzia eta Carles Cubos-ek zuzendua. Lehen pertsonan kontatua, euskal gatazkaren alderdirik emozionalenetako batean barneratzen da: amatasuna eta aitatasuna espetxean. Filmak espetxeratzearen ondorio intimoei buruzko begirada gizatiarra eta sakona eskaintzen du. 

Isildutako oroitzapenen eta esan gabeko hitzen artean, Ane bere istorioa berridazten saiatuko da zinemaren bidez. Bere ahotsa zauritik sortzen da, oinordetzan jasotakoari zentzua bilatzeko. 

Ane, zinema ikaslea, ETAren barruko harreman afektiboak arakatzen dituen gidoi baten idazketan murgilduko da, maitasuna erresistentzia indar gisa arakatuz. Espetxean jaioa, euskal gatazkak eta bere gurasoen militantzia armatuak zeharkatutako historia baten zama darama. Bere sorkuntza-prozesuan, haztearen konplexutasuna memoria kolektiboaren eta esperientzia pertsonalaren artean kokatzen da, bi plano horien arteko tentsioan aurrez aurre jarrita. 

Sormen taldeak urteetan egindako dokumentazio lan zabalean du abiapuntua proiektuak, preso dauden pertsonen zein haien familien testigantzak bilduz eta entzunez. Ikerketa horren emaitza memoria, sorkuntza eta hausnarketa uztartzen dituen narrazio bat da. 

Euskal Herria eta Katalunia artean filmatua, lanak ‘haur motxiladunen’ errealitate gordina ere jorratzen du: gurasoak bisitatzeko distantzia luzeak egin behar izaten zituzten ETAko presoen seme-alabak, motxila fisikoa ez ezik emozionala ere gainetik kentzerik izan ez zutenak 

Proiektuak ikuslearekin elkarrizketa enpatiko bat irekitzea proposatzen du: ziurtasunak zalantzan jartzea eta testuinguru konplexu baten barruan ikuspegi anitzak ulertzea sustatuz.

Filmaren musika nagusia Mikel Laboaren ‘Gure Hitzak’ klasikoaren bertsio bat da, Bernardo Atxagaren testuarekin, Elkar diskoetxearen baimenarekin.

Hainbat jaialdi eta aretotan estreinatu ondoren, gaur iritsiko da Filminera.