Stephen Kingen lanaren eta haren liburuen moldaketen zaleak urte oparoa bizitzen ari dira. 2025ean, hiru egokitzapen iritsi dira pantaila handira: ‘The Life of Chuck’, ‘The Monkey’ eta ‘The Long Walk’. Horrez gain, ‘It’ unibertsoan oinarritutako ‘Welcome to Derry’ telesaila ere estreinatu da. Eta, hori gutxi balitz, zerrendari beste izenburu bat gehitu behar zaio: zinemetan ikusiko den ‘The Running Man’. Egokitzapenaren zuzendaria Edgar Wright da, ‘Shaun of the Dead’ eta ‘Hot Fuzz’ film dibertigarrien arduraduna.

Etorkizun hurbil batean girotua, ‘The Running Man’ da telebistako ikus-entzule gehien biltzen dituen saioa. Lehiaketa hilgarri honetan, parte-hartzaileek –‘runner’ izenez ezagunak– 30 egunez biziraun beharko dute, hiltzaile profesionalak jarraika dituztela. Haien mugimendu bakoitza odol egarriz dagoen publikoari zuzenean ematen zaio, eta sari ekonomikoa handitzen doa egunetik egunera.

Ben Richards (Glen Powell), langile klaseko gizona, gaxorik dagoen bere alaba salbatzeagatik desesperatuta dago. Saioko ekoizle bihozgabeak, Dan Killianek (Josh Brolin), konbentzituko du lehiaketan parte hartzera, biziraupenerako azken aukera gisa. 

38 urte beranduago

Stephen King-ek liburua 1982an idatzi zuen, eta bost urte geroago, 1987an, Schwarzenegger protagonista zuen izen bereko filma egin zuten. Bada bitxikeria bat: eleberria 2025ean kokatzen da, hain justu Edgar Wright-en bertsio berria estreinatuko den urte berean.

New Yorkeko Comic Con jaialdian, Wright-ek aipatu zuen: «Arnold Schwarzeneggerren bertsioa ikusi nuenean, konturatu nintzen liburuan oso oinarrituta zegoela, gehiegi akaso, baina beti sentitu izan dut bazegoela istorioaren zati oso bat egokitu ez zena. Nire remake kutunak beste zerbait gehigarria eskaintzen dutenak dira, nortasuna dutenak. Beraz, hau ez da pelikula hori berregiteko saiakera bat, hau liburuarekiko leialagoa den zerbait da».