Abuztuaren 22tik irailaren 13ra jokatuko den 2026ko Vuelta, Monakon hasi eta Granadan amaituko da. Asteazken honetan aurkeztu dute ibilbidea Monakon eta zazpi amaiera izango ditu aldapan, bai eta 32 kilometroko erlojupeko bat eta hiru asteko lasterketan zehar ikuskizuna bermatuko duten eguneroko pizgarriak ere. Hori bai, hurrengo edizioa ez da ez Euskal Herritik, ez Asturiastik, ez Galiziatik igaroko, aurtengo itzulian Israel taldearen presentziagatik egindako protesta masiboen ondoriozko zigorra izango balitz bezala.

Monakoko Printzerriko Monte-Carlo Sporting klubeko Salle des Ètoiles aretoan aurkeztutako Vueltaren 81. edizioa, hirugarren urtez jarraian hasiko da Espainiako Estatutik kanpo, lau herrialdetako errepideetatik igaroko da, eta ez da Madrilen amaituko –aurtengo azken etapa bertan behera geratu ondoren Palestinaren aldeko protesta masiboengatik–. Lasterketak oso ibilbide mediterraneoa izango du, Andaluziako zortzi probintzietatik igaroko da, ohi bezala mendiak garrantzi handia izango du (zazpi etapa amaituko dira mendateetan), Cadizen gako izango den 32 kilometroko erlojupekoa izango du eta etapa guzti-guztietan izango ditu pizgarriak. Era berean, azken etapak erabakigarriak izango dira, goi-mendiak igo beharko baitituzte txirrindulariek.

Nazioarteko Vuelta: Monako, Frantziako Estatua, Andorra eta Espainiako Estatua

Lisboa eta Piemonteren ondoren, Monakoren txanda iritsiko da. Vuelta Printzerriko kaleetan egingo den 9 kilometroko erlojupekoarekin abiatuko da, eta puntu gorena 1 Formulako zirkuitu ezaguna izango du, helmuga bertan egongo baita.

Jardunaldi sinbolikoa izango da. Irteera Monte-Carloko kasinoaren aurrean kokatuta egongo da, eta ibilbideak Larvottoko hondartza eta Herkulesen portua inguratuko ditu zuzengune luze batetik, azken zatiari ekin aurretik.

Hurrengo bi etapak Frantziako Estatuan egingo dira, horietako azkena, itzuliko hirugarrena, Font Romeuko helmugan amaituko da lehen aldiz; mendate batean amaituko den itzuliko lehen etapa izango da. Hurrengo egunean, tropela Andorrara iritsiko da. Etapa oso-osorik egingo da Andorrako lurretan, eta lau mendate igo beharko dituzte txirrindulariek: Envalira (1. mailakoa), Beixalis (1. mailakoa), Ordino (1. mailakoa) eta La Comella (3. mailakoa).

Andorrako mendiak atzean utzita, Kataluniara abiatuko da itzulia, Tarragonako probintziara, Falset (Priorat eskualdea) eta Roquetes (Terres de L 'Ebre eskualdea) arteko bosgarren etapa egiteko. Tropela seigarrenean igaroko da Valentziara, Alcossebre eta Castelló artean egingo dena eta lau mendate izango dituena, tartean El Bartolo, hartxintxar (sterrato) zatiak ere badituena.

Ondoren, lehen astea ixteko, bost mendateko jardunaldi bat amaituko da Valdelinaresen, etapa lau bat jokatuko da Valentzian Puçol eta Xeraco artean, eta, atsedenaldiaren aurretik, plater nagusi gisa, sei mendateko desnibel metatu handiko etapa bat jokatuko da, Aitana gainean amaituko dena.

Calar Alto eta La Pandera bigarren astean

Atsedenaldiaren ondoren, Albaceteko probintziaren txanda helduko da Alcaraz eta Elche de la Sierra arteko hamargarren etapan, aldapan amaituko dena. Ondoren, Cartagena eta Lorca arteko etapan, helmugatik gertu egongo den 3. mailako Morrón de Totana mendatea izango da interesgunea. Jarraian, mendiko beste etapa gogor baten txanda izango da, Vera eta Calar Alto (Almeria) artean jokatuko dena eta bost mendate izango dituena, tartean Velefique ohorezko gonbidatua.

Atsedenaldirik gabe, hamalaugarren etapak Jaen eta La Pandera lotuko ditu; beraz, beste etapa amaiera bat mendate batean. Bigarren atseden eguna Palma del Rio eta Kordoba arteko etaparen ostean hartuko du tropelak.

Erlojupeko erabakigarria eta mendiko etapa gogorra Granadara heldu aurretik

Itzuliko hirugarren astea, beste edizioetan ez bezala, gozo hasiko da, eta etapa garrantzitsuenak amaieran pilatuko dira. Cadizeko erlojupekoak eta Peñas Blancas eta Collado del Alguacil mendateetako igoerek erabakiko dute Vuelta.

Azken esprinta hasteko, Cortegana eta Palos de la Frontera arteko etapa jokatuko da Huelvan. Ondoren, lasterketak Sevillan amaituko den esprinterrentzat hitzordu apropos batekin jarraituko du. Hemezortzigarren etapan, baina, Puerto de Santa Maria eta Jerez arteko 32 kilometroko erlojupekoa iritsiko da. Espezialistek ondo egingo dute eskalatzaileekiko denbora ateratzen badute, asteburua izugarria izango baita.

Hemezortzigarren etapak Vélez Málaga eta Peñas Blancasen arteko mendiko jardunaldia ekarriko du, lau mendaterekin eta aldapan amaituz. Azken oldarraldia Collado del Alguacil mendatean amaituko den etapan iritsiko da; orain arte igo gabeko Granadako mendatean amaituko da etapa, eta bost mendate izango ditu guztira, tartean bi aldiz igoko den Hazallanas eta El Purche; esan bezala, etapa Collado del Alguacil mendatean amaituko da, 1.900 metroko altueran, 17 kilometroko igoera baten ostean, batez beste % 6,6ko maldarekin eta gehieneko %18ko maldarekin.

Azken etapak Granada izango du irteera eta helmuga. Ez da Madrilgo ohiko tramitea bezain etapa lasaia izango, baina Vueltak, Alhambra ikusi ahal izateko pizgarriarekin, errege berria eszenatoki bikainean hartzeko ohorea izango du.