Japonian, pertsonak alokatzen dituzten 300 enpresa inguru daude. Hikari zuzendari japoniarrak 1980ko hamarkadan sortu zen fenomeno hori baliatuko du gaur egungo gizarteak bizi duen bakardadeari buruzko hausnarketa hunkigarri baten abiapuntu gisa. 

Gaur egungo Tokion girotuta, Brendan Fraserrek antzezten duen aktore estatubatuar bat da ‘Rental Family’ filmeko protagonista. Zazpi urte daramatza hirian lanean, hortzetako pastaren iragarki arrakastatsu batean parte hartu ondoren, baina ordutik bere bizitzari norabide edo zentzu bat aurkitzeko borrokan ari da. Egoera horretan, lan ezohiko bat onartuko du: Japoniako ‘alokairuko familien’ agentzia baterako aritzea, ezezagunentzat ordezko senide edo lagunen rolak interpretatuz. 

Zerbitzu horien bidez, akonpainamendua eskaintzen da ekitaldi sozialetan bikotea behar dutenentzat, lan-egoeretan babesa emateko, senide faltsu baten presentzia betetzeko edota, besterik gabe, bakardadearen pisua arinduko duen belarri arretatsu bat eskaintzeko. Bezeroen bizitzetan sakontzen duen heinean, lanaren eta errealitatearen arteko mugak lausotzen joango dira, eta benetako loturak sortzen hasiko dira. 

«Tokio bezalako hiri handi batean oso isolatuta senti zaitezke. Hitz egin nuen pertsona bakoitzak konexioa bilatzen zuen», azaldu du Hikarik. Zuzendariaren ustez, negozio mota horren gorakada Japoniako bakardade modernoarekin eta osasun mentaleko zerbitzuetarako irisgarritasun eskasarekin lotuta dago.