Gizarte bazterketa larria jasaten duten pertsonei funtsezko dokumentuak kudeatzen laguntzea; hauxe da Agiria Agerian programaren helburua. Hala adierazi dute Lakua eta Hirugarren Sektore Sozialeko hainbat erakundetako ordezkariek ostiral honetan Donostian egindako agerraldian.

Bertan azaldu dutenez, dokumentu-kalteberatasuna bereziki larria da etxerik gabeko pertsonentzat, baina baita, etxea izanda ere, bizitoki, lan edo familia-ezegonkortasuneko egoerei aurre egiten dietenentzat ere, egoera horrek baldintzatu egiten baitu gizarteratzeko prozesuan funtsezko baliabideak eskuratzea, hala nola ostatu-zerbitzuak, gizarte-laguntzak, osasuna, enplegua edo prestakuntzak.

Erakundeek eta eragileek egoera zaurgarrian bizi direnei dokumentazio pertsonala zaintzen eta kudeatzen laguntzen diete, dokumentazio hori behar bezala lortzea eta kontserbatzea eragozten duten oztopoak murrizten saiatuz. Eta Agiria Agerian sortu berri den berrikuntza sozialeko programa bat da, Metaposta erabiltzen duena dokumentu pertsonalak antolatzeko.

«Agiria Agerianen helburua ahultasun horri aurre egiteko biltegiratze digitaleko, seguruko eta doaneko soluzio bat bideratzea da, dokumentazio pertsonala behar bezala kudeatu eta zaintzeko. Pertsona guztien bizitza hobetzeko lan egiten dugu, eta bazterkeria-egoera larrian daudenak ere gure gizartearen parte dira, ez dugu inor atzean utziko», adierazi du Nerea Melgosa Ongizate, Gazteria eta Erronka Demografikoaren sailburuak. 

Hartzaileen profila

Programaren hartzaileak hainbat profil dituzten pertsonak dira: migratzaile gazteak, kontsumo edo buruko gaixotasunengatik kalean dauden pertsonak eta gizarte-bazterkeria jasateko arriskuan dauden familiak. Lakuak dioenez, dokumentu fisikoak motxila batean, eguneko zentroetako leihatiletan, konfiantzazko norbaiten etxean, aldi baterako bizileku batean edo jatorrizko herrialdean gordetzen dituzten pertsonak dira.

Pertsona horiei guztiei Metaposta eskainiko zaie dokumentuen kudeaketa errazteko. Izan ere, zerbitzu honek dokumentuak digitalki eskuragarri edukitzea ahalbidetzen du. Era berean, beste irtenbide digital publiko batzuk ere eskainiko zaizkie, inklusio-prozesuan funtsezkoak diren webguneetara erraz sartzeko, hala nola Nik Patrika Digitala.

«Dokumentu-kudeaketa digitalaren prozesua erraztea da helburua, gizarte-bazterkeriako egoeran edo arriskuan dauden pertsonek integrazio-aukera handiagoak eta autonomia handiagoa izan dezaten laguntzeko. Komunitate inklusibo baten eraikuntzan, dena da lagungarri; hau da, gehien behar duten pertsonei segurtasuna eta ahalduntzea ematen dien tresna berri bat, eta, gainera, gizarte-kohesioa sustatzen duena», gaineratu du Melgosak.

Agiria Agerianen bidez dokumentazio pertsonalaren eskuragarritasuna bezalako oinarrizko eskubide baterako sarbidea bermatu nahi dute programan parte hartzen duten eragileek, eta pertsonek beren dokumentu digitalak kudeatzeko autonomia izatea. Gainera, gizarte-zerbitzuen erabiltzaileen ahalduntze digitala sustatu nahi dute, eta gizarte-erakundeen harrera-prozesuak egokitu, digitalizatzeko aukerak aprobetxatuz.