EAEko Lanbide Heziketaren etorkizuna gidatuko duen ‘Euskadi 2030 Estrategia’ ibilbide-orri berria aurkeztu du astelehen honetan Lakuako Gobernuak Iberdrola Dorrean egindako ekitaldian. Imanol Pradales lehendakaria, Begoña Pedrosa Hezkuntza sailburua, Jon Labaka Lanbide Heziketako sailburuordea eta Lanbide Heziketako ekosistemari lotutako 300 pertsona baino gehiago bildu dira.

Estrategiak egungo erronka handietan jartzen du fokua: eraldaketa teknologikoa, trantsizio iraunkorra, belaunaldi- eta demografia-erreleboa, nazioartekotzea, lan-merkatuaren behar berriak eta gizarte-kohesioa. Hezkuntza sailak nabarmendu duenez, Lanbide Heziketa «inklusiboagoa, malguagoa, berritzaileagoa eta enpresarekin konektatuagoa» finkatzeko helburua du eta «gizarte-aurrerapenaren, aukera sorkuntzaren eta ekoizpen-sarearen lehiakortasunaren eragile gisa» duen zeregina indartu nahi du.

Azken hamarkadan, matrikulazioa %33 hazi da, eta gaur egun 51.600 ikasle baino gehiago daude Lanbide Heziketan inskribatuta. 20.000 enpresa baino gehiago ari dira zentroekin «modu egonkorrean» lankidetzan. Pradalesek azpimarratu duenez, «Euskadiko Lanbide Heziketa funtsezko palanka da eraldatzen ari den munduari arrakastaz aurre egiteko eta Euskaditik Europako berrindustrializazioari laguntzeko».

Bost ardatz

Lanbide Heziketako Euskadi 2030 Estrategia bost ardatzen inguruan egituratzen da; 20 helburu estrategiko eta 37 ekintza ditu, segimendu- eta ebaluazio-sistema bat du, eta bere indarraldiaren erdian berrikustea aurreikusten da.

Pedrosaren hitzetan, «estrategia erabilgarria eta praktikoa da, Lanbide Heziketa posible egiten dutenen egunerokotasunari laguntzeko pentsatua».

Lakuaren hitzetan, hauek dira bost ardatzak: Ikasleen garapen profesionala eta pertsonala bultzatzea; berrikuntza aplikatua, ekintzailetza eta zentroen gaitasuna sustatzea ingurunearen dinamizatzaile gisa; trantsizio berde eta justu batera bideratutako prestakuntza; gaitasun digitalak indartzea, teknologia berriak sartzea eta sortzen ari diren produkzio-inguruneetara egokitzea; eta nazioarteko proiekzioa, mugikortasuna, aliantzak eta talentua erakartzea, merkatu globalaren erronkei erantzuteko.

Hedapena laguntzeko, 2026-2030 epeari lotutako aurreikuspen ekonomiko bat jasotzen da: 339,4 milioi euro. Azaldu dutenez, «berrikuntzarekin, eraldaketa digitalarekin, nazioartekotzearekin, orientazioarekin eta enpresekiko lankidetzarekin lotutako jarduerak» sustatzera bideratuta egongo da aurrekontu hau.

Pedrosa: «Pertsona bakoitzaren talentua bultzatuko du»

Pedrosa sailburuak adierazi du Euskadiko Lanbide Heziketako 2030 Estrategia «uste sendo batetik» abiatzen dela: «Lanbide Heziketa herri kohesionatuago bat, aurreratuago bat eta pertsona guztientzako aukera gehiago dituen herri bat eraikitzeko motor handietako bat dela».

«Zentzu horretan, Euskadiko Lanbide Heziketa ez da soilik prestakuntza sistema bat, baizik eta ikaskuntza, berrikuntza eta eraldaketarako benetako ekosistema bat da, gizartearen zerbitzura dagoena. Inor atzean utziko ez duen Lanbide Heziketa bat nahi dugu: lagunduko duena, orientatuko duena eta bideak irekiko dituena. Pertsona bakoitzaren talentua bultzatuko duen Lanbide Heziketa bat, herri proiektu partekatu batekin lotuko duena», nabarmendu du sailburuak.