EAEko apartamentu turistikoek 276.504 sarrera eta 833.527 ostatu gau izan dituzte 2025ean, hau da, aurreko urtea baino %29,1 eta %15,8 gehiago, hurrenez hurren, Eustat estatistika erakundearen datuen arabera.

Ostatu gauek gora egin dute hiru herrialdeetan, maila desberdinean bada ere: %27,5 Bizkaian, %6,1 Gipuzkoan eta %6,0 Araban. Sarreren kasuan, Araban %14,6 jaitsi dira, eta Bizkaian eta Gipuzkoan %35,7 eta %21,4 igo, hurrenez hurren.

Atzerritar jatorriko pertsonen sarrerak, urtean zehar %37,1eko igoera izan ondoren, EAEko apartamentu turistikoetan 2025ean izandako guzien %41,3 izan ziren, 2024an izandako %38,9ren gainetik.

Plazakako okupazio mailak %0,2 puntuan gainditu du 2024an lortutakoa, eta apartamentukako okupazio mailak %5,2 puntuan; hala, 2025ean %39,6an eta %71,1ean finkatu dira, hurrenez hurren.

Landetxeak

Bestalde, EAEko landetxeek 183.900 sarrera eta 472.371 ostatu gau erregistratu dituzte, hau da, 2024an baino %6,7 eta %6,0 gehiago. Atzerriko bisitariak sarrera guztien %27,3 izan dira, %12,9 gehiago.

Herrialde bakoitzari dagokionez, sarrerak %10,5 igo dira Araban, %6,8 Bizkaian eta %5,2 Gipuzkoan; ostatu gauak, aldiz, %14,1 eta %6,9 igo dira Araban eta Gipuzkoan, hurrenez hurren, eta %0,2 jaitsi Bizkaian.

EAEko landetxeetako batez besteko egonaldia 2,57 egunekoa izan da iaz, 2024an erregistratu ziren 2,58 egunen oso antzekoa. Okupazio maila %31,4koa izan da plazen arabera neurtuta, eta %36,3koa logelen arabera neurtuta, 2024aren aldean %2,2 eta %2,4 puntu igo ondoren, hurrenez hurren.

Azkenik, EAEko turismo aterpetxeen kasuan, urte arteko %4,9ko hazkundea izan da 2025ean sarreren kopuruan eta %4,6koa ostatu gauenean, 262.558 sarrera eta 473.449 ostatu gau izan ondoren. Sarreren urteko igoera %86,2koa izan da Araban, %6,3koa Gipuzkoan eta %0,8koa Bizkaian. Ostatu gauek, bestalde, urte osoa hartuta, %63,3 egin dute gora Araban, %6,5 Gipuzkoan eta %1,3 Bizkaian.

Nafarroan, hotelek behera abenduan

Nafarroan, abenduan, 113.657 ostatu-gau izan dira hoteletan; hau da, %5,9ko jaitsiera izan da aurreko urteko hilabete beraren aldean. Egoiliarren ostatu gauak %10,7 jaitsi dira eta ez-egoiliarrenak %15,5 igo dira. 2025 urte osoan, berriz, ostatu-gauen kopurua %8,7 igo da aurreko urteko aldi beraren aldean.

Ostatu hartu duen bidaiarien kopuruak %9,0 egin du behera 2024ko abenduaren aldean, eta 61.333 izan da. Batez besteko egonaldia 1,9 egunekoa izan da, aurreko urteko hilabete berean baino % 3,4 luzeagoa. 2025. urte osoan, bidaiarien kopurua % 5,2 igo da aurreko urteko aldi berarekin alderatuta.

Abenduan, 10.653 plaza eskaini dira 236 hotel-establezimendutan. Plazen okupazio-maila %33,9koa izan da, aurreko urteko hilabete berean baino 1,1 puntu txikiagoa. Bestalde, Nafarroako hotel-zerbitzuak eskaintzeko 1.464 langile enplegatu dira, 2024ko abenduan baino %17,6 gehiago.

Okupatutako gela bakoitzeko hoteleneguneroko batez besteko fakturazioa (Average Daily Rate) 71,5 eurokoa izan da abenduan, eta zifra hori %2,4 jaitsi da aurreko urteko aldi beraren aldean. Gela eskuragarri bakoitzeko eguneko batez besteko diru-sarrera (Revenue per Available Room) hotel-establezimenduetako okupazioarekin eta prezioarekin lotutako kontzeptua da, eta 29,3 eurokoa izan da, aurreko urteko hilabete berean baino % 2,5 txikiagoa.