Erreskate taldeak jatorriz Ondarroakoa den Itoitz arrantza-ontzia aurkitzen saiatzen ari dira Galiziako uretan. Zantzu guztien arabera, arrantza-ontzia hondoratu egin zen denboralearen ondorioz. Tripulatzaileak beste arrantza-ontzi batek erreskatatu zituen asteartean. Ontziak bere izena mantentzen badu ere, urteak dira A Coruñako kaitik lan egiten duela.

Itsas Salbamenduak jakinarazi duenez, asteazkenetik ostegunerako gauean, Itoitz itsasontziari dagokion irrati-balizaren seinalea galdu egin zen eta, azken erreferentziaren arabera, litekeena da Peñas lurmuturretik 65 milia ipar-mendebaldera egotea. AIS seinalea ere galdu zen, ontziaren posizioa, norabidea, abiadura eta identitatea denbora errealean transmititzen duen irrati-sistemarena, hain zuzen.

Ondarroan du jatorria ontziak, eta Javier Sar armadore eta A Coruñako Muxia herriko alkatearena da. Itsasontzia jitoan zegoen joan den astelehenetik, istriborrera zihoan eskora salatu batekin, ziurrenik ur-bide batek eragindakoa.

Itsas Salbamenduak ostegun honetako 9.00ak pasata bidalitako jakinarazpenean adierazten duenez, arrantza-ontzia jitoan geratu zen eremuak 9 metrorainoko olatuak ditu, eta horrek eragotzi egiten du Alonso de Chaves atoiontziak esku hartzea. Beraz, denboralea baretzearen zain daude.

Itsas Salbamenduak gunea aztertzeko hegaldi bat egitea ere aurreikusten du, eguraldiak horretarako aukera ematen duenean, arrantza-ontzia hondoratu egin den egiaztatzeko.

Maria Pita ontziak Itoitz amarratzea lortu zuen astelehenean, baina itsasoaren egoerak askatzea eragin zuen eta, ondorioz, ezin izan zuten portura eraman.

Itoitzeko tripulazioa zazpi pertsonak osatzen zuten, eta asteartean Muxiako Abra arrantza-ontziak ebakuatu zituen. Helimer 402 Itsas Salbamenduko helikopteroak A Coruñara eraman zituen, ondoren. Arrantza-ontziaren jabeak adierazi zuenez, tripulatzaileek ez zuten osasun zerbitzuek laguntzerik behar izan.