Zerura begira esnatu dira igande goiz honetan tolosar eta inauterizale gehienak, baina nahiko ateri eutsi dio goizean zehar karrozen desfileari. Beste urtebetez tolosarrek demostratu dute irudimena borborka dutela eta molde guztietako mozorroak ikusi dira kale nagusian zehar. Inguruko herritarrak ere joan dira festaz gozatu eta mozorro irudimentsuen ideiak lapurtzera datorren urterako.

Barraskiloen lasterketak egin ditu lagun talde batek, beste batzuk une historiko gogoangarriak ekarri nahi izan dituzte akordura, izan da ardozalea izanik mahatsez mozorrotu denik ere, eta baita «Tolomitak, Tolosako bailarako eski estazioa» sortu duenik ere. Edozein kaletan txarangek girotutako espero gabeko mozorroekin egingo duzu topo igande honetan.

Goizean goizetik, 08.00etatik hain zuzen ere, Felipe Gorriti plazan bildu dira tolosarrak eta Dianarekin batera poz hotsez bete dituzte kaleak musikaren erritmoan. 10.00etan abiatu dira txarangak eta ordubete beranduago abiatu da karroza eta konpartsen irteera.

Mozorroak, musika eta jai giroa da nagusi horren berezia izaten den igandean Tolosan. Arratsaldean zehar ere musikak bete ditu kaleak aurrez iragarritako dantzaldia egongo da Zerkausian 19.00etan eta 22.30etan Janus Lesterren kontzertua Euskal Herria plaza. Hala ere, edozein kaletan topatu daiteke txarangaren bat giroa alaitzen.