Zuzendariaren izena filmaren izenburuan bertan agertzea nahiko bitxia eta ezohikoa izaten da. ‘Lee Cronin’s The Mummy’ Lee Cronin-en zuzendaritzapean iritsiko da zinema-aretoetara. Filma Jason Blum-ek eta James Wan-ek ekoitzi dute, Blumhouse Productions eta Atomic Monster ekoiztetxeen zigilupean. 

Kazetari baten alaba gaztea basamortuan desagertu da, arrastorik utzi gabe. Zortzi urte geroago, bat-batean itzuliko da, baina une familiar pozgarria izan behar zuena amesgaizto bihurtuko da. 

Jack Reynor, May Calamawy, Natalie Grace, Veronica Falcon eta ikusle askok ezagutuko duten Laia Costa aktore kataluniarra –Alauda Ruiz de Azuaren ‘Cinco lobitos’ filmean ikusia, besteak beste– dira filmeko protagonistak.

‘Lee Cronin’s The Mummy’ istorio klasikoaren bertsio guztiz desberdina izatea espero da.

Ibilbide luzea

‘The Mummy’ filmen historia ezagutzeko, 1932ra bidaiatu behar dugu, Universaleko munstroen urrezko aro liluragarrira. Boris Karloff-ek, beldurraren ikono ospetsuak, antzinako Egiptoko apaiz berpiztu baten papera egin zuen, bendaz estalita. James Whale-ren ‘Frankenstein’ filmeko munstroari bizia eman ondoren, Karloffek tonu ilun eta solemne berezia gehitu zion hilobitik esnatzen den momia madarikatu honen kontakizunari.  Haren itzalak luze iraun zuen, eta Universalek, arrakastaren aparretan, sekuela eta berrinterpretazio ugari sortu zituen ondorengo hamarkadetan. 

1950eko hamarkadaren amaieran eta 1960koan, Hammer Film Productions-ek ikuspegi berri bat eman zion istorioari, giro gotiko eta ilunago batez jantzita. Testuinguru horretan, Christopher Lee-k bere aztarna utzi zuen, 1959ko bertsioan munstroaren interpretazio sendo eta gogoangarria eskainiz. 

Hala ere, gaur egungo ikusle gehienentzat, momiaren madarikazioa 1990eko hamarkadan berpiztu zen berriro, abentura eta umorea uztartzen zituen ikuspegi batekin. Brendan Fraser eta Rachel Weisz protagonista zituen ‘The Mummy’ filmak eta ondorengo jarraipenek generoari arnas berria eman zioten, klasiko zaharra publiko berrietara hurbilduz.