Donostia Arraun Lagunakek Euskotren Ligako hirugarren garaipena lortu du Zierbenan, bertan jokoan jarri den Petronor bandera bereganatuz. Larunbatean Bilbon gehien gerturatu zitzaion ontzia, Tolosaldea, txandakide izan du gaur, eta berriz ere lehia estua izan dute biek.

Zierbenako estropada eremua engainagarria da, erronbo formakoa, eta begi hutsez ezin da erreferentzia fidagarririk izan ziabogara arte. Baina GPSak ez zioen gezurrik, eta maniobran bi segundoko aldea zegoen Arraun eta Tolosaren artean.

Itzulerako luzean, olatuak baliatzeko borrokan, aldeak ez dira asko handitu, baina egia da beti Arraun Lagunak aurretik ibili dela. Ohikoa duen azken txanpa bikainari esker, donostiarrak 10:48.02ko denborarekin nagusitu dira, tolosarrei 6,50 segundoko tartea ateraz.

«Nire estrenoa zen Euskotren Ligan eta pozez zoratzen nago. Esan didate Nagorek eta Juan Marik estropada eremu berezia dela, ez fidatzeko ikusten nuenaz eta erreferentziak pinganillotik jasoko nituela. Gure sentsasioez fidatzeko. Hala egin dugu eta ongi atera zaigu», adierazi du Amaia Eguren patroiak.

Txandako beste bi ontziak, Hibaika eta Orio, oso azkar geratu dira atzean. Hibaikaren kasuan saritzat har daiteke ohorezko txandan aritzea eta bosgarren geratu da sailkapenean. Orioren kasua kezkagarriagoa da, azken postuan amaitu duelako jardunaldia –ziur asko kale txarrenetik joanda, hori ere egia da–.

Izan ere, lehen txandan, Astillero izan da denborarik onena lortu duena: 10:59.62. San Juanekin borroka polita izan dute kantabriarrek eta amaieran aldea segundo bakarrekoa izan da. Hibaika bera ere San Juanengandik 80 ehunenekora geratu da, dagoen parekotasunaren erakusgarri.

Beheko borrokan, gaur Donostiarrak Zumaia atzean uztea lortu du lehen aldiz, sailkapen nagusian amore emateko asmorik ez duela argi utziz.

X. PETRONOR BANDERA
1. Donostia Arraun Lagunak    10:48.02
2. Tolosaldea                            10:54.52
3. Astillero                                10:59.62
4. San Juan                              11:01.14
5. Hibaika                                  11:01.94
6. Donostiarra                           11:04.52
7. Zumaia                                  11:06.78
8. Orio                                       11:12.10

EUSKOTREN LIGA - NAGUSIA
1. Donostia Arraun Lagunak    24 puntu
2. Tolosaldea                            18 p.
3. Astillero                                15 p.
4. Hibaika                                 13 p.
5. Orio                                      13 p.
6. San Juan                              12 p.
7. Zumaia                                   8 p.
8. Donostiarra                             5 p.