Donald Trump AEBko presidenteak Ormuzeko itsasartea berriro irekitzearen inguruan zabaldutako azken mezua gezurtatu dute Irango arduradun politikoek eta militarrek, inolako akordiorik lortu ez dutela argudiatuta.

«Gezurra besterik ez da», adierazi dute Irango negoziazio-taldeko iturriek Fars agentziaren arabera. «Estatu Batuetako ekintza maltzurrek jarraitzen duten bitartean, itsasarteak itxita jarraituko du», gaineratu dute.

Tasnim Irango agentziak ere gezurtatu egin du Trumpek duela ordu batzuk bidalitako mezua, Iranen aurkako azken operazioak bertan behera uztea erabaki zuela azalduz, Teheranek hala eskatuta, itsasartea berriro irekitzeko aukera mahaigainean jarrita.

Abbas Araqchi Irango Atzerri ministroak larunbat gauean jakinarazi zion Faisal bin Farhan Saudi Arabiako presidenteari Ormuzeko egoera ez dela batere aldatu, eta bere herrialdea prest dagoela AEBko edozein erasori erantzuteko.

Trumpen iragarpena eta mehatxua

Larunbatean Trumpek Iranen aurkako eraso bat atzeratu zuela esan zuen, Ormuzeko itsasartea «berehala eta osorik irekitzea» barne hartzen duen akordio bat iragarri ondoren.

«Iranek eta Ekialde Ertaineko beste herrialde batzuek edozein eraso atzeratzea eskatu digute, akordio baten oinarriak adostu direlako. Horrek Ormuzeko itsasartea berehala, osorik eta erabat irekitzea eta Iranen mehatxu nuklearraren amaiera ekarriko luke», adierazi zuen Truth Socialen.

Nabarmendu zuenez, akordio bertan behera utziko du «betiere akordioa azkar ixtea lortzen bada». «Israelek bat egiten du konpromiso horrekin. Ekin lanari eta lortu!», gaineratu zuen. 

Ekainaren 17an, Washingtonek eta Teheranek elkar hitz egiteko esparru bat adostu zuten zuten, Israelek eta AEBek otsailaren 28an hasitako gerrari amaiera emateko. Horri esker, Ormuzeko itsasartea berriro ireki zen eta bi hilabeteko negoziazio-epea adostu zuten behin betiko akordio nuklearra lortzeko.

Hala ere, ordutik eraso gurutzatuak errepikatu dira, eta Trumpek amaitutzat eman zuen elkarrizketarako esparrua; Iranek, berriz, iragarri zuen itsas pasabidea blokeatu egingo zuela.

Azken asteetan, indarkeria areagotu egin da. Soldadu estatubatuarrak hil dira Iranek Jordaniaren eta Iraken aurka egindako erasoetan, eta Saudi Arabia gatazkan sartu da Estatu Batuekin batera Irakeko milizien aurka egindako erasoan.