Ana Gracianik idatzi eta zuzendutako ‘La ventana abierta’ filmak Bilboko FANT jaialdiaren 32. edizioan izan zuen mundu mailako estreinaldia, Sail Ofizialaren barruan. Andaluziako landa-kostaldeko neguan girotuta, Gracianik suspensezko istorio bat proposatuko du.

Rubén, adin ertaineko gizona, Internet bidez ezagutu duen emakumearekin elkartuko da lehen aldiz. Horretarako, bidaia luzea egingo du Andaluzia mendebaldeko kostaldeko herri txiki eta urrun batera iristeko. Baina bere harridurarako, iristean Vera topatuko du, bere bikotekide birtualaren alaba.

Vera nerabe azkarra, ausarta, oldarkorra eta energia handikoa da. Ekialdeko haizeak gogor jotzen duen arren, etxeko egongelako leiho handia zabal-zabalik dago, eta neskak ziurtatzen duenez, hala egon behar du, azalpenik eman nahi ez duen arrazoi batengatik.  Verarekin zenbat gehiago hitz egin Rubének zalantzan jartzen hasiko da Mercheren inguruan eraiki zuen irudia.

«Bestea guztiz ezagutzen ez dugunean konfiantza lurralde ezegonkor nola bihur daitekeen arakatzeko beharretik sortu da filma. Gainera, espazio itxia eta isolamendu sentsazioa funtsezkoak dira filmean: arriskua ez dago beti kanpoan, batzuetan harremanaren beraren barruan dago», azaldu du Ana Gracianik. «Ez nuen thriller konbentzional bat egin nahi, baizik eta istorio bat non psikologikoa eta emozionala izango ziren suspensearen benetako motorra», gehitu du. 

Aktoreen artean nabarmentzen dira Unax Ugalde aktore gasteiztarra, Adriana Camarena, Mara Guil, Alberto López, Adriana Espina eta Sofía Allepuz. 

Filma La Claqueta PC, La Cruda Realidad, Acheron Films eta Amania Films euskal ekoiztetxearen arteko koprodukzioa da. Azken honetatik atera dira, besteak beste, 'Jone, batzuetan' eta 'Ane' filmak. Gaur egun, Amania David P. Sañudo, Elena Maeso, Agustín Delgado, Kevin Iglesias, Fernando P. Sañudo eta Martín Caballeroz osatuta dago.