Mende erdiz ibili da Kilometroak jaialdia herriz herri, ikastolaz ikastola lekukoa pasaz belaunaldi berriei. Hain justu, Lazkaon ekin zion ibilbideari, eta bertara itzuli da aurtengo edizioan.

«Ikastolak herritik sortu ziren, klandestinitatean, guraso talde batek euskaraz ikasteko eskubidea genuela sinetsi zuelako», ekin dio Irantzu Amundarain Lazkaoko ikastolako lehendakariak.

«Ibilian-ibilian, buelta» lelopean, egun osoko egitarau oparoa antolatu dute gaurko egunerako, jolasak, musika eta bertsolaritza tarteko. 

Hain justu ere, Eider Mendoza Gipuzkoako ahaldun nagusiak, Joxe Migel Iztueta 'Lazkao Txiki' bertsolariak Oiartzunen behin botatako bertsoa gogorarazi du: «Egin ezazue kalean eta etxean gure mintzoaz, eraldatu betikotasun guztian, gure euskaran».

«Ametsa eta ideia zoro bat»

Era berean, Josu Erguin Kilometroen lehen edizioaren bultzatzaileetako bat bertan izan da. Buruan «ametsa eta ideia zoro bat» zituela azaldu dute haren ordezkariek, baina «irrikitan» zegoela desira hori ideia bera zuten lagunekin partekatzeko.

Datorren urteari begira, Kilometroak Bergaran ospatuko direla iragarri dute, eta horrekin batera, Antton Mendizabalek sorturiko lekukoari erreleboa eman eta berria estreinatuko dutela.

Gotzon Huegun artistak eman dio forma lekuko berriari, «Ikastolen langileak, gurasoak eta ikasleak irudikatzen dituen» zurezko eskulturaren bidez. «Erdiko hutsunea etorkizunari begiratzeko leihatila gisa irudikatu dut», zehaztu du egileak.

Egunari jarraipena emateko, eguerdiko 13:30ean bertsolariek girotuko dute bigarren gunea, eta horren ostean trikitilariak izango dira.

Musikaren doinu finek, aldiz, Iturrialde aparkalekua saltoka jarriko dute: Edu Zardoya, Skabidean, Muxutruk eta Nafarroa 1512. Batukadak emango dio itxiera egunari.