EAEko BPG %2,2 eta enplegua %1,4 hazi dira urteko bigarren hiruhilekoan

Aurtengo bigarren hiruhilekoan EAEko Barne Produktu Gordina %2,2 eta enplegua %1,4 hazi dira iazko aldi beraren aldean. Hazkundea batez ere zerbitzuen sektoreak bultzatu du, eta 13.000 lanpostu berri sortu dira, Eustaten lehen zenbatespenen arabera. Irailaren 19an datu zehatzagoak emango ditu.

Euskal Autonomia Erkidegoko Barne Produktu Gordina (BPG) %2,2 eta enplegua %1,4 hazi dira 2025eko bigarren hiruhilekoan, aurreko urteko aldi beraren aldean, Eustat estatistika erakundeak hiruhileroko kontu ekonomikoen aurrerapenean egindako zenbatespenen arabera.

Era berean, estatistika erakundeak jakinarazi duenez, Arabako, Bizkaiko eta Gipuzkoako BPGren igoera %0,5ekoa izan da urteko bigarren hiruhilekoan lehenbizikoarekin alderatuta. Aurrerapena egiteko unean eskuragarri dagoen koiunturazko informazio ekonomikoaren arabera, 2025eko bigarren hiruhilekoan ikusitako urtetik urterako igoera zerbitzuen sektorearen bilakaeran oinarritu da nagusiki.

Bestalde, enplegua %1,4 igo da urtetik urtera lanaldi osoko lanpostu baliokide gisa neurtuta, eta, beraz, 13.000 lanpostu baino gehiago sortu dira. Aurreko hiruhilekoarekin alderatuta, berriz, enpleguan zenbatetsitako igoera %0,3koa izan da.

Eustatek irailaren 19an argitaratuko ditu 2025eko bigarren hiruhilekoko BPGren eta enpleguaren zenbatespen bereiziak hiruhileroko kontu ekonomikoetan, aurrerapena egiteko unean eskuragarri ez dagoen koiunturazko informazio ekonomikoa gehituta.