Abortua Georgia sakonean

APRIL
Georgia, 2024. 134’. Zuzenda eta gidoia: Dea Kulumbegashvili. Aktoreak: Ia Sukhitashvili, Kakha Kintsurashvili, Merab Ninidze, Roza Kancheishvili. Musika: Mathew Herbert. Argaz.: Arseni Khachaturan. 

Orain dela bost urte ‘Beginning’ opera prima zirraragarriarekin mundu guztia harrituta utzi ondoren, Dea Kulumbegashvili zinemagileak bere bigarren film luzea dakar; abortu klandestinoak praktikatzen dituen eta arduragabekeria leporatzen zaion ginekologo baten erretratu psikologiko eta onirikoa eskainiko du. Bi film luze soilik zuzendu dituen arren, Georgiako zinema berriaren ezinbesteko zinemagileetako bat bihurtu da Kulumbegashvili.

Georgiako landa-herri txiki batean jaioberri bat hil da erditzean, eta Nina izeneko ginekologoaren moral eta profesionaltasuna aztertu beharko dute, legez kanpoko abortuak egiten dituela dioten zurrumurruen artean.

Luca Guadagninok koproduzitua, ‘April’ filmak Georgia sakonean emakumeen sexualitatea, moralitatea, genero indarkeria, zapalkuntza patriarkala eta emakumearen rola aztertzen ditu.

Veneziako Nazioarteko Zinemaldiaren 81. edizioan izan zuen mundu mailako estreinaldia, eta Epaimahaiaren Sari Berezia jaso zuen bertan, ikuspegi ausarta eta zinema-estilo paregabea nabarmenduz.

Filmaren ezaugarri nagusia plano luze eta estatikoen erabilera da, baita egoera zailen irudikapen gordin eta apaingarririk gabea ere.