Aitziber Sarobe Biologoaren iritzi artikuluak, gaur egungo Mendietako Zuzendaria erasotzen du: Birlandaketak, mendi-garbiketak eta oro har basoen zainketa lanak egiten dituen enpresa batetik etorri izana gaitzesten du.

Bada denbora puska bat, 2.400 bazkide baino gehiago dituen (GEBE) Gipuzkoako Baso Elkartean Urola Kosta eskualdeko ordezkaria naizela. Matxinbentako baserri batetan bizi naiz eta Julian Unanue, gaur egungo Mendietako Zuzendaria ezagutzen dut, beste arrazoien artean, bere baserria ere Azpeitian dagoelako.

Harrituta nago, ingurumen talde hauek hedabideetan duten oihartzunarekin; baita Landa Garapen Departamentuko arduradunentzat derrigorrezko erizpide-emaile izateko duten borondatearekin, basogintzarako dirulaguntzak banatzeko orduan, adibidez.

‘Natur Taldea’ko elkarteei buruz ezagutzen dudana da, natur zaletasunak elkartzen dituen pertsonak direla, aste buruetan mendi ibilaldiak, erakustaldi edo hainbat gai jorratuz hitzaldiak antolatzen dituztela. Astean zehar, orokorrean heuren bizimoduak industria, administrazio, eta abarretik ateratzen dituzte.

Deigarria da gutxienean, 16 talderen izenean mintzatzea heuren baitan dituzten pertsona kopuruaz deus esan gabe; demokrazia sistema batean oinarrizko kontua izaki. Aldarrikapen ekitaldiko argazkira zuzendu ezkero, uste dut 6 pertsona ikusi nituela.

Nioen bezala, talde hauek BILDUko gobernu taldearen eskutik aldaketak espero zituzten. Zihurta dezaket landa eremuan bizi garenok ere baietz.

Aurreko taldea, EAJren eskutan eta ‘mendiz-mendi mendez-mende’ zigilupean, landa inguruan garapen hiritarra egitera mugatu zen: Ibilbideak, Parketxe sarea, eta Life proiektuak (3 milioi € mehatxatuta dauden bi intsekturen babes eta ikerketara bideratuak) izan ziren beraien ikurrak.

Eusko Jaurlaritzak, PSOEren eskutan, Gipuzkoako landa eremuko biztanleen beharren gainetik pasatuz Natur Sarea 2000 garatzen xahutu zituen bere indarrak. Gipuzkoan bakarrik, Europako legislazioaren esku utzi ditu 41.306 hektarea (hau, Lurralde osoko azaleraren %20 da) zeinetatik %40,37 partikularrak diren. Hori burujabetasun ukazioa da; oraindik lortu ez dugunean. Europako Komunitateko aholkuak ere gainetik pasatuz planifikatu du eremu guzti hori, Baso Kudeaketa Jasangarria definiziotik eduki ‘ekonomiko eta sozialak’ ezabatu eta eduki ekologikoekin bakar-bakarrik gelditu dira. Eremu hauen finantzaketarako, Landa Garapenerako baliabideak erabiltzea proposatzen dute. Alegia, Natur Taldea elkarteekin bat, landa eremutik finantzatzea proposatzen dute hiritik ulertutako naturaren kontserbazioa.

Aitziber Sarobe biologoak egungo Mendi Zuzendariari buruz idatzitakoari dagokionez, eta bere helburua mendiko lanean eta lanetik bizi delako gutxiestea izanik, aurreko guztia berresten da. Julian Unanue aspaldiko urteetan ezagutzeko ohorea izan dudan pertsona gisa esango nioke, besteak beste, EHNE baserritarren sindikatuan lan ugari egin eta baserri askotako bideen hobekuntza lanak gidatu dituela; eta Urola Kostako Mendi Nekazaritza Elkarteko gerente zela aldaketa politikoengatik ordezkatua izan zen arte. Eta hortik aurrera, politika munduan poltrona bila saiatzetik hurrun, bere enpresa propioa sortu zuen. Lan postuak sortu zituen eta kontratatzen dutenek eskatutako lanak egin ditu. Eta izan duen lan pilagatik esan daiteke, ez duela oso gaizki egiten.

Beraz, BILDUk aukeratu duen Mendien Zuzendaria ezin egokiagoa izan da gaiarekiko ezagutza, eskarmentua eta inguru honekiko duen loturari dagokionez, eta ez dezagun ahaztu bere eginkizuna Ingurumena, Biodibertsitatea, ea. zaintzeaz gain, Landa Garapenari laguntzea dela.