Nafarroako Administrazio Auzitegiak murriztu egin du Euskararen Ordenantzaren aplikazio esparrua. Hauxe zioen aurreko gobernu taldearen Euskararen Ordenantzak, 1. artikuluan:

«Ordenantza hau Iruñeko Udalean aplikatzekoa da, halakotzat hartuta hala Udala bera, zentzu hertsian, nola haren sektore publiko instituzionala osatzen duten erakundeak».

Ordea, Pamplona Centro Histórico-Iruña Biziberritzen SA udal sozietate publikoak ez zuen bete Euskararen Ordenantza, arkitekto teknikoaren oposizio-lehiaketan (Nafarroako Aldizkari Ofiziala, 2019ko azaroaren 4a). Hau da, ez zion deialdiko puntuen %5 eman euskaraz jakiteari, Euskararen Ordenantzak agintzen zuen moduan.

Errekurtso baten aurrean, Nafarroako Administrazio Auzitegiak erabaki du, 2020ko martxoaren 10ean, ez dagokiola berari erabakitzea euskara puntuatu behar den, deialdiari buruz zuzenbide pribatua aplikatu behar omen delako.

Beraz, Euskararen Ordenantza praktikan ez da aplikagarria sektore publiko instituzional osoan, ordenantzak dioenaren kontra. Euskararen Ordenantzak bere balioaren zati bat galtzen du horrela.

Uste genuen Euskararen Ordenantzak berma zezakeela euskara puntuatzea, baina interpretazio honekin ez da hala. Epaileek (auzitegi zehatz honetan ez dira epaileak, Zuzenbideko lizentziadunak baizik) gehien-gehienetan egiten dituzte arauen interpretaziorik bihurrienak euskararen kaltetan. Horren aurrean, euskaldunak babesgabe gaude.

Aipatutako deialdian aplikatu beharreko Ordenantza aurreko udal gobernuarena zen. Orain, «Mayaren Euskararen Ordenantza» dago indarrean, baina hasiera-hasieratik hori ere ez da aplikatzen, euskararen alde behintzat: Udalak «zapi» bat banatu du etxez-etxe, aurten sanferminik ez dagoela gogorarazteko, eta Udaletxean ere zapi erraldoi bat zintzilikatu du, eta bietan ere euskararen tamaina gaztelaniarena baino txikiagoa da, «Mayaren Euskararen Ordenantzaren» kontra (Euskararen Ordenantzaren bigarren xedapen gehigarria; Nafarroako Aldizkari Ofiziala, 2020-4-14).

Agintari eta epaileentzat, arauak beti dira bete beharrekoak, salbu euskararen aldekoak direnean.