Festa giroan ospatu dute ostiral honetan Lekeition Antzar Eguna, San Antolin jaien barruan, eguzkia lagun portua mahoiz jantzitako jendez gainezka zegoela. Aurte ere kuadrillen parte-hartzea handiagoa izan da eta iaz baino bi potin gehiago izan dira antzarraren lehian, guztira 106.

Arratsaldeko lauretan ekin diote ontziek gomazko antzararengana hurbiltzeari, horietako askok Palestinako banderekin. Txandaka, potinetik uretara salto egin eta sokatik zintzilik zegoen gomazko antzararen lepoari helduta burua kentzen saiatu dira, batzuk zorte handiagoarekin jasoaldi gehiago eginez eta beste batzuk gutxiagorekin.

Hiru ordu inguruz luzatu da txapelketa. Joanes Irigoien Kortabitartek egin ditu jasoera gehien buruarekin, lau guztira. Arnaitz Casco Urkiagak, berriz, hamar jasoaldi egin ditu, baina bururik gabe. Biek 300na euro eskuratu dituzte. Potinik bizkorrena, berriz, Potosarri izan da, eta dotoretasunaren saria Mariberakok eskuratu du. Guztira 231 jasoaldi izan dira eta ondoren jokatu den Mastapunta txapelketako irabazlea Jokin Ruiz de Erentxun izan da.

Duela 300 urte baino gehiago du sorburua antzararen festak Lekeition. Hamarkadetan bizirik zeuden hegaztiekin ospatu zen, gero hildakoengandik ordezkatu zituzten eta 2022tik aurrera plastiko eta gomazko antzarak erabiltzen dituzte.

San Antolin jaiak astelehenera arte luzatuko dira Lekeition.