Lakuako Exekutiboaren gobernu kontseiluak lau laguntza onartu ditu astearte honetan Cambridgeko Unibertsitateko Clare Hall ikastegian ikertzaile bisitari gisa aritzeko 2025-2026 ikasturterako, Zientzia, Unibertsitate eta Berrikuntza Sailak proposatuta.

Gobernuko arduradunek jakinarazi dutenez, laguntzen zenbatekoa 130.038 eurokoa da bederatzi hilabeteko bi egonalditarako (‘Visiting Fellow’ modalitatea), eta 29.676 eurokoa bi hilabeteko bi egonalditarako (‘Post Visiting Fellow’ modalitatea).

Jasotako eskaerei erantzun hobea emateko eta ‘Euskadi-Erresuma Batua’ lankidetza ikerketa hezkuntza arloetan sustatzeko, Zientzia, Unibertsitate eta Berrikuntza Sailak erabaki du laguntzen kopurua handitzea eta deialdiaren testua egokitzea, modalitateei eta iraupenari dagokienez.

Horrela, ‘Visiting Fellow’ modalitatean, bi plazetako batean digitalizazio eta STEAM (zientzia, teknologia... eta artea eta humanitateak bezalako arlotetako jakintzak) proiektuen arloetako ikertzaileek izango dute lehentasuna, arreta bereziki Matematika Hezkuntzan jarrita. ‘Post Visiting Fellow’ modalitatean, berriz, ezinbesteko baldintza izango da Clare Hall unibertsitate eskolako ‘Visiting Fellow’ izatea ikasturteko deialdia egin aurretik.