ETA MAITA HERRIA... (BIGARREN ATALA)
Bigarren atal honetan, lehen peredikuan, pastoraleko sujet edo protagonistak aurkezten dira: Patxi eta Idoia. Iruñera joan dira biak lan egitera, zein bere herritik, eta han ezagutuko dute elkar. Lehenengo jelkaldian hasiko da haien istorioa.
LEHEN PEREDIKÜA
Arizale guziak (kanpotik) eszenatokirat iganen dira. Pastorala abian da.
1. Herri-antzerkia azkar
Baskoniako ibarretan.
Mauletik Bargotarat.
Hiri hontako karriketan.
2. Agur, jende orori!
Egun on Euskal Herria!
Pastoralak sor ditzala
negarra eta irria!
3. Gaurko gure süjetak,
alegiazkoak izanki,
bataiatuko ditugu
bat Idoia bertzea Patxi.
4. Biziko duten abentura
guzientzat ezaguna.
Nekazaritza utzirik
fabrikan etorkizuna.
5. Etxean zituzten jakin (ezagutu)
ardi, behi eta mandoak.
Baratzea, belardiak,
basoko lanak, soroak…
6. Epe aski laburrean
bizimoldeak aldatu.
Herrian beren asmoak
baitzitzaizkien hondatu.
7. Iruñerat abiatu.
Laster lantegian hasi
gostuko ez zuten lanetan.
Nonbaitetik behar bizi!
8. Hala ere sorlekua
maitatzen zuten biziki.
Ia astero egiten
bat edo biga sar-ilki (bisita arina).
9. Gure hizkuntza aldeko
defentsan ziren agudo.
Klase-arteko borrokan
izanik ere arras kauto (zentzudun).
10. Patxi auzo gau-eskolan
maitemindu zen Idoiaz.
Elkarrekin kamus (ezer gabe) hasi.
Alta, bizitzeko doiaz.
11. Andrea haur beharretan.
Bikotea zorion gosez
apaintzen beren habia.
Uros (zoriontsu) izateko luzez.
12. Sar zaitezte eta ikusi
gure antzerki nazionala.
Xiberoan sustaturik.
Hots, gure Herri-pastorala.
Arizaleak eszenatokitik erretira, bakoitza bere atetik. Eszenatokia orobat hutsik geratu da.
1. JELKALDIA
Patxi gaztea Euskal Herriko herri tiki batean sortu da. Laborarien familia luze baten barnean. Lurra errentagarritasun aldetik gero eta antzuagoa da; abeltzaintza berdin. Makineria berria tai gabe sartzen ari da; subentzio guti, legar handiak… Nekazaritza xehez bizi izatea zaila da egun.
Jelki taulara Patxiren familia (borta urdinetik); etxeko sukaldean solasean hasten dira.
Fermin (aita)
13. Ez duk urterik hoberena.
Matxuratuta traktorra.
Mahastietan bizkarroiak.
Lurra ja ez da bihikorra.
14. Garagarren prezioa
gutitu duk neurri gabe.
Esnearenaz, haragienaz
ez mintzatzea diat hobe.
Donado (osaba)
15. Aberatsa ez bahaiz,
PAC* sarien eskuratzeak
mozkorren eleak dituk.
Zaramazkiek haizeak.
16. Urruneko intxaurrak
izan daitezkek hamalau;
usu agitzen bezala
hurbiltzen haiz eta lau.
Leire (ama)
17. Herrian zituan dendak,
ostatuak, ogi labe,
harategia, botika…
Ikusi, husturik tanpez.
18. Bertako eskola zaharra
aspaldian zitean itxi.
Egunero autobusez
nahi baditek ikasi.
Izaga (arreba tikia)
19. Eskualdeko eskolarat
bertakoa itxiz gero.
Inguruko haurreria
han biltzen gara egunero.
Alaitz (arreba tikiena)
20. Erran nahi dut bat oraino:
Maite dudala handizki
autobusez joatea.
Marirekin bereziki.
Xabier (anaia)
21. Zer duzue neskatikoek?
Tarrapataka ohera!
Nagusien eleketak
zuentzat dira sobera.
Haurrak erretira ate urdinetik (eskuin).
Eneko (anai gehiena)
22. Traktore gidaria naiz,
soldata ona badaukat.
Honek lagunduko, arauz (jakina),
jarraitzeko aitzinerat.
Donado (osaba)
23. Patxi saiatuko balitz
Iruñean lana xerkatzen…
Mekanikan jaioa duk.
Txopia (bultzada tikia) zaiok faltatzen.
Eneko (anai gehiena)
24. Elekatuko natzaio
beheko landetan bihar.
Ezin jakin zer barra duen...
Gogo onez dezake har…
Guziak taulatik erretira ate urdinetik.
2. JELKALDIA
Eneko (anaia) Patxirekin mintzatu da eta honek Iruñerat joatea onartu du. Herrian oraindik, hondarreko egunak aprobetxatzen, profitatzen ari da inausketako lanetan.
Jelki taulara Patxi eta Araceli adiskidea (ate urdinetik); biak mahasti batean ari dira.
Patxi (süjeta)
25. Zeru oskarbi, zohargia.
Zinez eguraldi ederra.
Eztitasunez haizea
magal hontan, egutera.
Araceli (adiskidea)
26. Txantxangorrien tak-tak-tak.
Kaskabeltzaren txistua.
Okilaren tok, tok, tok, tok.
Txirriskilaren kantua.
27. Mila erleen burrunba.
Ehun kilkerren azantza.
Barbaloten (intsektuak) harrabotsa.
Txitxarraren harramantza.
Patxi
28. Ote larreen horaila.
Kuku-prakaren urrina.
Mitxoleten kolorea.
Txilarraren usaina.
Nekazari batzuk handik agertzen dira eta elkar agurtzen dute.
Jelki taulara Patxiren adiskideak (kanpotik).
Birdi (adiskidea)
29. Agur Patxi, ongi zara?
Izan dezazuen egun on.
Ostatutik pasa gero.
Ongi bazaizu, e? gizon.
Beltza (adiskidea)
30. Kartetan izanen gara.
Ilunabarrean, aizu!
Nafarroako mus saria
gori-goria baduzu!
31. Txato (adiskidea)
Joanen zarela, dakigu,
laster Iruña alderat.
Ea zoria baduzun
gure aldetik xedeak.
Jelki eszenatokira arizale guziak (bakoitza bere atetik). Kantatzera doaz.
*PAC: Europako Nekazaritza Politika Bateratua