ELA, LAB, ESK, Steilas, EHNE, HIRU eta, bereizita, CCOO sindikatuak asteartean Durangon elkartu dira aurreko ostiraleko lan-heriotza salatzeko. Durangon lanean ari zen 22 urteko gazte portugaldar bat eraikitzen ari ziren eraikineko bosgarren pisutik erorita hil zen.

 Lehenengo elkarretaratzea CCOOek deitutakoa izan da, eta, ekitaldi honetan, Alfonso Ríosek, zentral horren ordezkariak, laneko segurtasunean eskumena duten erakunde eta entitate publikoei eskatu die «zaintza sakona» egin dezatela istripuak saihesteko, «batez ere kontratazioa gehiegizkoa den sektoreetan».

Ekitaldi horren ondoren, ELA, LAB, ESK, Steilas, EHNE eta HIRU sindikatuek beste elkarretaratze berri bat egin dute Durangoko San Fausto auzoan 22 urteko gaztearen heriotza salatzeko, ‘Lan istripu gehiagorik ez! Prekarietatea hiltzailea’ lelodun pankarta baten atzean.

Lan heriotza gaitzetsi eta «langileen prekarizazioa» salatzeaz gain, istripu hilgarri hau «berehala» ikertzeko eskatu dute, haren arrazoiak eta erantzukizunak argitzeko.

Laneko istripua Durangoko Kuritziaga kalean gertatu zen, eguerdiko hamabiak baino zertxobait lehenago. LABek egun horretan bertan gogorarazi zuenez, 2021 urtean eroriko baten ondorioz hil den hirugarren langilea izan da azken hau.