Datorren ostegunean, martxoaren 17an, Iruñeko Golem Baiona zinema-aretoetan estreinatuko da Tus Ojos 2030 ekoiztetxeak, Nafarroan eta Aragoin minbizia duten haurrekin lan egiten duten Adano eta Aspanoa elkarteekin elkarlanean, egindako ‘Aquí y ahora, vida’ filma.

‘Aquí y ahora, vida’ minbizia duten haurrek protagonizatutako pasarteek osatutako film luzea da, helduentzat eskuraezinak diren jakinduria eta egokitzapena erakusten dutenak. Ez da dokumental bat, gaixotasunaren etorrerarekin sortzen diren emozioak erakusten dituen istorio multzo bat baizik.

«Gure helburua, ikerketarako beharrezkoak diren funtsak lortzeko bidean, hondar ale bat gehiago jartzea da, eta, horrez gain, minbizia duten haurrek egunero bizi duten egoeraren inguruan gizartea kontzientziatzea eta sentsibilizatzea», azaldu du Manuel Serrano zuzendariak.

«Bere esperientzia nola aldatzen den islatu nahi dugu, osasun-langileen, elkarteen, boluntarioen eta egoera berean dauden beste familia batzuen laguntzari esker, eta ustekabeko ezbehar baten aurrean borrokatzen eta laguntzen buru-belarri ari diren pertsonen unibertso oso bati esker», gaineratu du Serranok.

Gazteentzako filma

Filma publiko guztiei zuzenduta dago, batez ere gazteenei, haurren minbizia normalizatu eta klasean eta gizartean hitz egiten den gai orokorretako bat bihurtu nahi baitu. Gainera, ikerketaren eta haur gaixoen eta haien senideen alde lan egiten duten elkarteen garrantzia ezagutarazi nahi du. Horretarako, datozen hilabeteetan goizeko emanaldiak egingo dira Estatu osoko zinema aretoetan, ikasleei zuzenduta.

‘Aquí y ahora, vida’ gaixotasunari lotutako estereotipo negatiboak alde batera uzten ditu, pertsonak sendatze-prozesuan guztien babesa funtsezkoa dela iradokitzen eta kontzientziatzen lagunduko duen begirada berri bat sortzeko.

Kultura- eta hezkuntza-tresna bat da filma, ikuslearengan gogoeta sustatzen duena, eta gaixotasunak jotako pertsonek egunez egun bizi duten errealitatera hurbiltzen duena. Azken finean, ikusleei haurren minbiziaren aurka borrokatzeko jolasera bat egiteko gonbita egiten dien obra da.

Inplikatutako Nafarroako erakundeak

Enpresa eta erakunde asko inplikatu dira filmaren garapenean, eta era askotara egin dute: ekonomikoki lagunduz, filmatzeko espazioak lagatuz edo figuraziorako langileak emanez. Hala, ‘Aquí y ahora, vida’ Nafarroako Gobernuaren, Nafarroako Unibertsitate Ospitalearen (CHN), Tuterako Sofia Erregina Ospitalearen, Aragoiko Osasun Ikerketarako Institutuaren, Club Atletico Osasunaren, Corellako Alhama BHIren eta Magallongo Udalaren laguntza du.

Gainera, enpresa eta erakunde asko inplikatu dira filma gauzatu ahal izateko: Rocopolis, Senda Viva, Gestempo, Sanbe, CMR La Ribera, Ecolaundry, Beatriz, Juan de Lanuza ikastetxea, Arpa Abogados, Nafarroako Unibersitate Klinika, CC Asesores eta Cinfa.

Bizitzaren Zuhaitza

Filma martxoan estreinatuko da hainbat hiritan. Martxoaren 15ean, asteartea, Zaragozan, bi egun geroago, Iruñeko Golem Baiona zinema-aretoetan; martxoaren 19an, Madrilen; martxoaren 22an, Toledon; martxoaren 23an, Tomelloson (Ciudad Real); eta apirilaren 3an, Corellan eta Alfaron.

Estreinaldira joaten direnek Bizitzaren Zuhaitza marraztu ahal izango dute, neska eta mutil askoren esku arrastoen formako hostoz osatutako zuhaitza, hain zuzen ere. Minbizidun haur eta nerabeei, haien adoreari, ausardiari, etorkizun partekatu batean egindako ekarpenari eta munduan uzten duten arrastoari egindako omenaldia eta errekonozimendua da.