NAIZ

Aurtengo udaberrian ‘Etxera Egunak’ ospatuko ditu Sarek herriz herri

Sarek Euskal Herriko zenbait herritan ‘Etxera Egunak’ antolatuko dituela iragarri du. Egoerak hobera egin badu ere, gogora ekarri du oraindik ere «elementu asko ditugula konpontzeko» eta mobilizatzen jarraitzeko beharra azpimarratu du.

Sareak Urnietan egindako agerraldia, pasa den udazkenean.
Sareak Urnietan egindako agerraldia, pasa den udazkenean. (SARE)

Datozen hilabeteetan Euskal Herriko hainbat udalerritan ‘Etxera Egunak’ ospatuko dituela jakitera eman du Sarek. Mobilizatzen jarraitzeko «gizarte aktibo bat» behar dela azpimarratu dute, «konponbideak eskatzen dituena».

Besteak beste, Amasa-Villabonan, Leitzan, Arrotxapean, Lesakan, Etxarri Aranatzen, Agurainen, Aiaraldean, Azpeitian, Zumaian, Oiartzunen, Aretxabaletan, Arrasaten, Pasaian, Orereta-Errenterian, Tolosan, Lasarte-Orian, Gasteizen edota Berangon antolatuko dituzte ‘Etxera Egun’ hauek, «fase berri honetan euskal presoek oraindik orain jasaten dituzten eskubide urraketak salatu eta etxerako bidea egiteko dituzten oztopoen salaketa egiteko».

Urruntze-politikaren amaieran gauden honetan, azken bi urte eta erdietan emandako pausoei balioa eman nahi izan die Sarek, hala nola, «lehen graduaren amaierak, ondoren egindako hurbilketak, aberriratzeak, preso batzuk, pixkanaka eta oztopo askorekin, etxerako bidea egitea..». Halaber, gogora ekarri dute «orain arte eman diren aurrerapenak parlamentuetako adostasunen eta akordioen ondorio direla, baina baita, zalantzarik gabe, gizartearen aktibazioaren ondorio ere». Hain zuzen ere, aktibazio horri eusteko asmoz antolatuko dituzte ekimenak.

Azaldu dutenez, salbuespenezko espetxe-politikak «herri honetan bizikidetzaren eta bakearen alde egiten ari diren urratsak oztopatzeko asmo argia» du, esaterako, «urruntzeak, zigorren batuketak edo ia bizitza osoko zigor luzeen ezarpenak, hirugarren gradura iristeko edo baimenak lortzeko oztopoek edo eta larriki gaixo daudenak etxera itzultzeko dituzten oztopoek». Hori dela eta, mobilizatzen jarraitu beharra dagoela nabarmendu dute, gizarteari ikustarazteko «oraindik elementu asko ditugula konpontzeko».