Euripean ospatu da larunbat honetan Getariako Txakolinaren uzta berriaren aurkezpena, herri gipuzkoarrean. Aurtengo uzta 11 gradikoa, «afrutatua eta azidotasun puntu orekatukoa» dela nabarmendu du bertan Itziar Eizagirre Getariako Txakolina Jatorri Deituraren presidenteak, gaineratu duenez, txakolinari «berezko freskotasuna» ematen diona.

Getariako Balentziaga Museoan egin den aurkezpen ekitaldian, upategi ekoizleak, erakundeetako ordezkariak eta gastronomiaren munduko pertsona ezagunak bildu dira. Ekitaldian zehar 2026ko Mahasti Jaun izendatu dira CEBANC Sukaldaritza Eskola bere 50. urteurrenean eta Aiala Sukaldaritza Eskola bere 30. urteurrenean.

Ekitaldiaren ondoren, Getariako San Anton egunarekin batera, herri dastaketa eta ospakizuna egin da Getariako frontoian. Bertan, inskribatutako 23 upeltegietako txakolinak dastatu ahal izan dira.

2025eko uzta

Jatorri Deituratik nabarmendu dute 2025a urte hezea izan dela, baina «mahastizaunen profesionaltasunari esker» ekoizpen ona lortu ahal izan dela kalitateari dagokionez, ia 2024ko uztaren kopuru bera. Upeltegiak «berritzen ari dira, baina Getariako Txakolinaren tradizioari eta nortasunari eutsiz, ardo freskoa, graduazio ertainekoa eta ahoan orekatua, azidotasun leunarekin», ziurtatu dute.

Ekoizpena 2.536.000 litrokoa izan da. Beraz, merkatura «gutxi gorabehera» 3.300.000 botila aterako direla aurreikusten da, eta litro horietatik %90 txakolin zuria dela, %9-10 gorria eta beltza ez dela %1era iristen ere azaldu dute. Apardunari dagokionez, 30.000 litro inguru egiten dira urtero, betiere upeltegien beharren arabera. «Azken urteetan, upeltegietako elaborazioen gama handitzen joan da, kontsumoaren ohitura eta gustu aldaketek markatutako premia», zehaztu dute.

Cebanc eta Alaia, Mahasti Jaun

Cebanc eta Aiala sukaldaritza-eskolek jaso dute Mahasti Jaun izendapena. Cebanc Sukaldaritza Eskola Gipuzkoako Sukaldaritza eta Ostalaritzako goi-mailako aurrenengo Eskola da. Sektorean ospe handia du, eta 50 urteko esperientzia Lanbide Heziketan eta Etengabeko Prestakuntzan. Enplegagarritasunaren, berrikuntza metodologikoaren eta enpresekiko etengabeko konexioaren alde egin duen apustuak ikasleen lan-aukerak hobetzen eta lurraldearen dinamismo ekonomikoa eta soziala indartzen lagundu du.

Zarautzen egoitza duen Karlos Arguiñanoren Aiala Sukaldaritza Eskolak, aldiz, 30 urteko ibilbidea bete du Gipuzkoan sukaldari eta ostalari profesionalak trebatzen. Prestakuntza-ereduak ikaskuntza praktikoa eta sektorearekiko lotura lehenesten ditu, lurraldeko enpresa eta profesionalekin lankidetzan. Aialak belaunaldien arteko erreleboa egiten eta ogibidea etengabe hobetzen lagundu du gastronomiaren arloan.