Ohi den bezala, Euskal Herrian trail runningeko lasterketen asteburu bete-betea izan dugu. Horietako bat, Euskal Herria Mendi Erronka, gainera, hitzordu ofiziala izan da: ultra modalitateko Nafarroako Txapelketa. Bada Leitzako irteerara 446 lasterkari hurbildu ziren. Lehia indibiduala izateaz gain, taldekakoa ere jokatu zen.

446 lasterkariek ez zuten aitzakiarik izan eguraldiarekin, eta horrek ikuskizunean eragina izan zuen. Mendialdeko eta Aralarreko parajeak zeharkatu zituzten. Lasterketa hasi aurretik, antolatzaileek Gorka Urbizu musikariari omenaldia egin zioten.

Gizonezkoen mailari dagokionez, esan behar dugu Borja Zubizarretak lasterketa biribila egin zuela. 67 kilometroko eta 7.200 metroko desnibel metatua zituen ibilbidean oso erregularra izan zen; uneoro lehenbiziko hiru postuetan izan zen. Azkoitiko korrikalariaren estrategiak ondo funtzionatu zuen, eta lehen postuan zeharkatu zuen helmuga 6 ordu 31 minutu eta 18 segundoko denborarekin. Zubizarretaren garaipenak plus bat izan zuen; izan ere, errekor berriarekin egin zen. Imanol Cañamares eta Ibai Primicia ere, oso ondo ibili ziren, eta elkarrekin heldu ziren Leitzan zegoen helmugara 7 minutu eta 42 segundora. Lehen bi nafarrak izan ziren.

Naroa Uriak, berriz, irabazi zuen emakumezkoen kategorian. Lehen sailkatuen artean lehia estua bizi izan zen. Azpeitiarrak beste martxa bat sartu zuen Ireberren (56 km) eta lehen postuan iritsi zen Leitzara. Olatz Azazeta bigarrena izan zen irabazlearengandik 6 minutu eta 43 segundora. Nafarroako Txapelketarekin egin zen altsasuarra. Miren Bastida hirugarren postuan sailkatu zen 16 minutu eta 29 segundora. 

Erreleboen lehian, azkenik. Paula Alberdik eta Mikel Arriolak osatutako taldea nagusitu zen.

Irati eta Gasteiz

Nafarroatik irten gabe, Irati-Abodi mendi gunetik irten zen Irati Trail lasterketa. 450 korrikalari 30 kilometro eta 2.000 metroko goranzko desnibela dituen ibilbidean lehiatu ziren. Eguzkia eta tenperatura freskoaren laguntzarekin hasi zen lasterketa, baina Ori mendian laino itxia izan zuten. Irati-Salazar taldeak antolatutako hitzordu hori Eneko Mazak irabazi zuen 3:10:01 denborarekin. Bigarren postuan Miguel Mujika helmugaratu zen bilbotarrarengandik ia 2 minutura. Mikel Otaño hirugarrena izan zen 10 minutu eta 51 segundora.

Alacanteko Nuria Ortak ia lasterketa osoa menderatu zuen. Garaipen handia sinatu zuen 4:07:14 kronoarekin. Maribel Jaillita bigarren postuarekin (3:11:57) egin zen, eta Amets Maiztegi  hirugarrenarekin (4:11:19).

Nafarroatik Arabara egingo dugu salto Gasteizko Mendiak lasterketa aipatzeko. Manuel Iradier Txangolari Elkarteak antolatutako ultra lasterketa (62 kilometro eta 5.000 metroko desnibel metatua) Markel Urigoitiak irabazi zuen mutilen kategorian 5:21:58 denborarekin. Otxandioko korrikalariaren atzetik Iosu Hidalgo sailkatu zen ia sei minutura, eta Jokin Garcia hirugarrena izan zen 5 ordu eta 35 minutuko kronoarekin.

Nesken mailan, berriz, Ainara Urrutia aise gailendu zen 62 kilometroko ibilbidean 6 ordu eta 35 minutuko denborarekin. Aretxabaletarrak zortzi minutuko aldea atera zion bigarren sailkatuari: Irune Velez de Mendizabali. Hirugarren postua Aina Hernandezek sinatu zuen 7 ordu eta 16 minutuko denborarekin.