Hiru hitzordu finkatu ditu Zetakek Gasteizen ‘Km0’ proiektu berria aurkezteko. Buesa Arena pabiloian izango da, urtarrilaren 16, 22 eta 23an. Proiektu berriaren iragarpena San Mamesen egin dute, ostiralean eta larunbatean aretoa bete ondoren. Guztira, 80.000 lagunek gozatu dute Mitoaroa III ikuskizunaz, nahiz eta atzoko kontzertua euriaren ondorioz atzeratu behar izan.

‘Km0’ proiektua Mitoaroa trilogiaren arrakasten ondoren iritsiko da: Mitoaroa I (orainaldian girotua) 2025eko urtarrilean Iruñean aurkeztu zen; Mitoaroa II-k iraganera egin zuen jauzia eta iazko irailean Donostian izan zen; eta Mitoaroa III-k etorkizun distopiko batean murgildu du ikuslea.

San Mamesen bildutako milaka lagunez gain, oihartzun zabala izan du ikuskizunak ETBk eskainitako emanaldietan. Izan ere, telebista publikoak emandako datuen arabera, «larunbat gaueko saiorik ikusiena» izan zen larunbat gauean, %11,1eko kuotarekin.

Guztira, 270.000 ikuslek jarraitu zuten emanaldia ETBn. ETB ONeko emanaldiak, bestetik, ia 10.000 erabiltzaile lortu dituela zehaztu dute ETBko iturriek.

Gasteizko Buesa Arenan egingo den urtarrilak 22 eta 23ko kontzertuetarako sarrerak, 15.500 ikusle ingururentzako edukiera duen aretorako, igande honetan jarri dituzte salgai 12.00etan, Pello Reparaz buru duen taldearen webgunean. Ordu gutxitan, bi hitzorduetarako sarrera guztiak saldu dituzte. Hori dela eta, hirugarren data bat iragarri dute sare sozialen bidez, urtarrilaren 16rako, eta sarrerak asteartean jarriko dira salgai, 10.00etan.