Bilboko Konpartsek Aste Nagusiko 47. Lehiaketa Gastronomikoa aurkeztu dute astelehen honetan. Aurtengo edizioak azken urteetan arrakasta izan duen eredua sendotuko du, eta berritasun nagusi gisa Basque Beer garagardo-dastaketa hartuko du. Aldi berean, Arrozen Lehiaketa indartuko da, parte-hartzaile berriei, bereziki gazteei, Lehiaketa Gastronomikoan sartzeko ate nagusi gisa.

Lehiaketa hutsa izatetik harago, Gastrogunea belaunaldi ezberdinen topagune bihurtu da. Bertan elkartzen dira urtez urte parte hartzen duten sukaldari beteranoak, lehen aldiz izena ematen duten gazteak, familiak, kuadrillak eta egunero Areatzara giroaz gozatzera hurbiltzen diren milaka lagun. Hori da urtez urte Lehiaketa Gastronomikoa bizirik mantentzen duen osagai nagusia. 

Aurten sendotuko den apustuetako bat Arrozen Lehiaketa da. Aste Nagusiko lehen igandean egingo da berriro ere, sailkapen orokorretik kanpo. «Aurreko edizioetan izan duen harrera bikainaren ondoren, lehiaketa hau parte-hartzaile berrientzako ate nagusi bihurtu da, bereziki gazteentzat. Kostu txikikoa eta irisgarria den proposamena da, edozein pertsonak edo kuadrillak Areatzan kozinatzeko esperientzia bizi ahal izan dezan, aurretiaz esperientzia handirik izan gabe», azaldu du konpartsen federazioak. 

Betiko platerrak eta berritasunak

Lehiaketa Gastronomikoaren egitarauak azken urteetako plater klasikoak mantenduko ditu: Astelehenean, barazki-pistoa; asteartean tortilla; asteazkenean txipiroiak bere tintan; ostegunean sukalkia; ostiralean bakailaoa pil-pilean; larunbatean marmitakoa; eta igandean, buztan gisatua. Izen-emateak iaz bezala egingo dira, horretarako prestatutako gunean, behar bezala seinaleztatuta. Bertan banatuko dira, halaber, lapikoak eta lehiatzeko beharrezkoa den material guztia. 

Ohiturari eutsiz, tortilla lehiaketaren egunean goizeko lehen orduan izena ematen duten parte-hartzaileek patatak eta arrautzak jasoko dituzte, izakinak agortu arte, babesleen laguntzari esker. Gainera, sari berezienetako bat mantenduko da: tortilla onena prestatzen duenak urte osorako arrautzak irabaziko ditu. 

Azken urteetan ezinbesteko bihurtu diren jarduerak ere mantenduko dira. Gastrotxikik gastronomia txikienei hurbiltzen jarraituko die, jolasean ikasteko tailerren bidez. Era berean, Lurreko Merkatuak berriro ekarriko ditu bertako ekoizleen produktuak Areatzara Aste Nagusiko lehenengo igandean, baserrien lana eta tokiko produktuen balioa azpimarratuz. 

Aurtengo berritasun nagusia Basque Beer garagardo-dastaketa izango da, Aste Nagusiko lehen astelehenean. Horri esker, Gastroguneko dastaketa-eskaintza handitu eta Euskal Herrian ekoitzitako produktuen sustapenean beste urrats bat emango da.