Mouriscot aisialdi zentroko bi begirale sexu erasoengatik eta adin txikikoen galbideratzeagatik ikertzen dituzten bitartean, Biarritzeko Udalak gune horien segurtasuna bermatzeko zein bortizkeriak eragozteko horrelako kasuetan hartu behar diren neurriak zehaztu nahi izan ditu. Pasa den astelehenerako, abuztuak 3, aisialdiko udal zentroen antolaketa «berehala» indartzea aurreikusi zuen.

“Sud Ouest” egunkariaren arabera, familiei zuzendutako erantzun batean, hiriko eskoletako eta eskolaz kanpoko taldeetako 145 ikasleren gurasoek sinatutako gutun irekiari jarraituz, Serge Blancok uztailaren 31n, «gure kontratazio, kontrol eta prebentzio prozedura guztiei» buruz ikerketa administratibo bat hasteko eta auditoria independente bat abiarazteko eskatu zuela adierazi zuen.

JARRAIPENA INDARTU

Erreakzio hori joan den uztailaren 23an Biarritzen egindako elkarretaratzearen ondotik heldu da. Egun horretan, ehun bat guraso udaletxeko atarian bildu ziren eta Biarritzeko Udalari azalpenak ematea eta Mouriscot aisialdi zentroaren funtzionamendua aldatzeko plan bat martxan jartzeko eskatu zioten. Euren aldarrikapenen artean, zuzendaritza kargutik kentzea eta tituludun zein kualifikatutako pertsonak kontratatzea zeuden, besteak beste.

Ici Pays Basque irratiaren arabera, abuztuaren 3ko astetik aurrera, hainbat neurri aplikatu beharko lirateke, hala nola haurren artean gutxienez bi profesionalen presentzia sistematikoa, banakako laguntzen jarraipena eta erregistroa, zainketen jarraipen sendotua eta indarkeria matxista eta sexuala prebenitzeko taldeen prestakuntza. Era berean, Udalak dio beste egiaztapen bat egingo dela begirale guztien erregistro administratiboetan.

AURREKARIAK

Auzia joan den uztailaren 21ean ezagutzera eman zen, Mouriscot zentroak kontratatutako 21 eta 36 urteko bi begirale atxilotu zituztenean, 3 eta 4 urte bitarteko haurren aurkako bortxaketa eta sexu eraso susmoengatik. Azkenean, alde batetik sexu erasoa eta bestetik adingabea galbideratzea egotzi zieten bi begiraleei. Epailearen kontrolpean dauden bi begiraleek gertaerak ukatzen dituzte.