NAIZ

Euskaberrek Euskadi Elikatuz Jasangarritasun Saria jaso du

Eroskik eta Lakuak antolatutako Euskadi Elikatuz Sarien epaimahaiak jasangarritasuna modu integralean ulertzeko Euskaberren eredua goraipatu du, baserrien bideragarritasun ekonomikoa, baserritarren ongizatea, animalien zaintza eta ingurumen-inpaktua murriztea norabide berean uztartzen dituelako. 

Euskadi Elikatuz Sarien banaketa ekitaldia, ostegun honetan Basque Culinary Center-en.
Euskadi Elikatuz Sarien banaketa ekitaldia, ostegun honetan Basque Culinary Center-en. (EROSKI)

Euskaberrek irabazi du Euskadi Elikatuz Sarien lehen edizioko Jasangarritasun Saria. Ekitaldia Lakuak eta Eroskik bultzatu dute nekazaritzako elikagaien sektorearen berrikuntza, konpromisoa eta etorkizuna aitortzeko. Hiru arlo nagusi bereizi dituzte —berrikuntza, jasangarritasuna eta belaunaldien arteko erreleboa—, elikadura-katearen etorkizunerako giltzarri diren erronkak ikusgarri egiteko.

Jasangarritasunaren kategorian 60 hautagaitza aurkeztu dira eta horien artetik Euskaber aukeratu du epaimahaiak. Jasangarritasuna ulertzeko bere modua jarri du balioan, besteak beste, jasangarritasuna ez delako ingurumen-inpaktua murriztera mugatzen, ekonomia, pertsonak eta ingurunea batera hartzen dituen kudeaketa-eredua delako Euskaber. Hala, kooperatibak hartzen dituen erabakiek hiru xede dituzte: oilategiak ekonomikoki bideragarriak izatea, baserritarren bizi kalitatea eta lehen sektorearen etorkizuna bermatzea, eta jardueraren ingurumen inpaktua etengabe murriztea.

Ostegun honetan, Basque Culinary Center-en egin den sari banaketa ekitaldian horixe azpimarratu du Karmele Pikabea Euskaberreko kudeatzaileak: «Guretzat jasangarritasunak ezinbesteko hiru hanka ditu, ekonomikoa, soziala eta ingurumenekoa; eta elkarrekin egin behar dute aurrera, bestela ez da inoiz jasangarria izango. Adibide bat jartzearren, karbono-aztarna murrizten esfortzu handia egin baina horrek baserritarren bizi baldintzak okerrera eramaten baditu ezin dugu esan eredu hori jasangarria denik».