Andoni Arabaolaza
Kazetaria, mendian espezializatua / Periodista, especializado en información sobre la montaña

Ainhize Belarrek urrezko beste pasarte bat idatzi berri du

20 urteko eskalatzaile atxondarra ‘La planta de Shiva’ ibilbidearekin 9b graduan sartu da. Villlanueva del Rosarioko (Malaga) lerro hori egiten hirugarren emakumea izateaz gain, maila hori lortzen munduko zazpigarren neska bihurtu da.

Ainhize Belarrek 9b mailako  "La planta de Shiva" ibilbidea kateatu berri du.
Ainhize Belarrek 9b mailako "La planta de Shiva" ibilbidea kateatu berri du. (Mar Diaz Miranda)

Behin baino gehiagotan aipatu dugu, modu batera edo bestera, Ainhize Belarrek bikain hartu duela Josune Bereziartu historikoaren lekukoa. Bederen, 20 urteko eskalatzaile atxondarra Euskal Herriko eta gure ingurumariko kirol eskaladaren ekarpenaren bidean dago. Eta horrela erakutsi du berri du ‘La planta de Shiva’ ibilbidearekin.

Villanueva del Rosarioko (Malaga) lerro horrek 9b maila du; hortaz, lehen euskal neska da gradu hori lortzen. Estatu espainiarreko lehenbizikoa ere. Oraindik «kobazuloan» sartuta dago lortutako arrakasta aztertzen, eta horregatik eskalada horren inguruan orain arte honako adierazpena egin du bere sare sozialetan: «Beti amestu izan dut egun batean bide hori eskalatzea. Dena prozesatzen saiatzen ari naiz oraindik. Eskerrik asko bidaia honengatik, sentiarazi didan guztiarengatik, eta bere parte izan diren guztiengatik».

Aurreratu dezakeguna da, 2024an Baltzolako ‘Iñi’ Ameriketan” (9a+) kateatu zuenean, ‘La planta de Shiva’ bizkaitarraren helburuen artean kokatu zela. Bidaia bat baino gehiago egin ditu, baina tartean, burua argitzeko, beste xede batzuetan buru belarri ikusi dugu. Adibidez, iaz gai izan zen bere bigarren 9a+ sinatzeko: ‘Zeleputza’ (La Leze, Ilarduia).

Hirugarrena

‘La planta de Shiva’ igoerari dagokionez, esan behar dugu marra historikoa dela; izan ere, ibilbide horrekin Angela Eiter austriarra 9b mailan sartzen lehen emakumezkoa izan zen. Anak Verhoeven belgikarra bigarrena izan zen, eta, diogun bezala, Belar hirugarrena. Horri guztiari gehitu behar diogu lehen lerroko gizonezkoak Malagako lerro horretatik igaro direla: Adam Ondra, Jakob Schubert…

Eskalatzaile bizkaitarra gaztea da, 20 urte besterik ez ditu; alabaina, munduko eskalatzaileen artean goi mailan leku berezia erdietsi du. Bai, soilik zazpi emakumezkok 9b mailan (edo gorago) kokatu dituzte euren buruak. Eiter, Verhoeven, Laura Rogora, Julia Chonourdie, Brooke Raboutou, Janja Garnbret eta Belar dira protagonistak.