Bob Odenkirk berriz ere akziozko thriller baten protagonista

NORMAL
Britainia Handia, 2025. 90’ Zuzen.: Ben Wheatley. Gidoia: Derek Kolstad, Bob Odenkirk. Akt.: Bob Odenkirk, Lena Headey, Henry Winkler, Jessica McLeod. Musika: Harry Gregson-Williams, Ryder McNair. Argaz.: Armando Salas.

‘Nobody’ filmeko protagonista eta gidoilaria, Bob Odenkirk eta Derek Kolstad (azken hau ‘John Wick’-en sortzailea izateagatik ezaguna), berriro elkartzen dituen akziozko thrillerra da 'Normal'. Ben Wheatley zinegile britainiarrak zuzendari lanak betetzen ditu. 

Normal izeneko herri txiki eta lasai batean, sheriffaren heriotza goiztiarraren ondorioz, Ulisesek (Bob Odenkirk) jarduneko sheriffaren kargua hartu beharko du. Handik gutxira, kanpotar bikote batek hiriko bankua lapurtu eta, oharkabean, Normal herrixkaren atzean dagoen sekretu iluna ezagutuko dute. 

Bertako biztanle guztiak prest daude edozer egiteko, eta ez dira ezeren aurrean geldituko herriaren sekretuak babestu eta beren bizimodu berezia gordetzeko. Ulisesek erabaki zail bati aurre egin beharko dio, eta hainbeste sekreturen artean bizirik irauteko borrokatu beharko du. Bat-batean, denak saiatuko dira hari tiro egiten, baita bere laguntzaileak ere.

Protagonistaren azalean Bob Odenkirk aktorea sartuko da, eta bere alboan Lena Headey eta Henry Winkler aktore ezagunak ere arituko dira, besteak beste.

Bob Odenkirk eta  Saul Goodman

Odenkirk-en ibilbidea umore absurdu eta esperimentaletik antzezpen dramatikoetara igaro da. ‘Breaking Bad’-eko Saul Goodman abokatu karismatiko, ahaztezin eta etika gutxikoa izan da zalantzarik gabe, orain arte egin duen lanik onena. Telesailaren bigarren denboraldira arte agertu ez bazen ere, hain indartsua izan zen bere presentzia, publikoaren faboritoetako bat bihurtu zela. 2015ean, gainera, ‘Breaking Bad’-en spin-off eta prekuela bat sortu zuten, pertsonaiaren jatorrietan zentratua: ‘Better Call Saul’, maisulana.  

Odenkirkek Emmy sarietarako hainbat izendapen jaso zituen eta bere interpretazioagatik txalotua izan zen. Paper horrek bere ibilbidea birdefinitu zuen, ordura arte nagusiki komediari lotua zegoena, eta lehen mailako aktore dramatiko gisa zuen estatusa sendotu zuen.