Berriro ernegatuta, Kamio? M-k loa kentzen dizu maiz eta gudu-zelai batera daramazu irudimenean, buruz buru jokatuko zenuketen neurketan zeure garaipena irudikatzeko baino balio ez dizun norgehiagoka distopiko batera. 

Badakizu barruan irakiten duzun hori dohainik askatzeak ez duela deus balio, okaztatze horretan bularrezurra eta laringea ere kiskali egingo zaizkizulako, eta gero ez da erredurak baretuko dituen nahikoa Almax psikologikorik izango. 

Andoaingo eta Tolosako udaltzainek tiro praktikak egin dituzte Intxaurrondon. Galindo. Zabalza. Lasa eta Zabala. Gizarteari asaldura atera zaio azalean, zoster herpes mingarri baten antzera.  Arkautin ere sentitu dute azkura, baina garauak hazkatzeak gero zauriak uzten ditu, eta orbanak, egon, badaude lehendik. Ironiaz egin duzu denboran atzera, Iñigo Urkulluri zoru etikoa gomazko pilotez josi zitzaiola ohartarazi zioten hartaraino.

Izan ere, euskal udaltzainak irudikatu ditugu berdez jantzitako agenteekin tiroak botatzen, eta azal gaina hotzikara kolektibo batek besarkatu badu ere, polizia eredua noraino den izurrite galdetu diozu zeure buruari. 

Ekidin ezina izan zaizu Santurtzira itzultzea, ekainaren 22ra. Ander Saenz, udaltzainak, taser pistolak... Eta zuri bost non ikasi zuten haiek halako armak erabiltzen, inpunitatea ez den beste ezer ez badago hartzen diren erabaki horien gainetik.  

Polizia eredua bera da zalantzagarritasunaren sorgune, aurrerakoitasunerantz baino, militarizazio iluneranzko joera nabarmena baita azken denboran hartzen ari dena. Kamio, M-k moduan eztabaida horrek ere gauero loa lapurtzen badizu, ez eraman armarik eraiki duzun gudu-zelai horretara, batez ere, erabiltzen jakiteaz harago, zertarako zaizkizun baliagarri barneratzeko gai ez bazara. Hain zuzen, polizia ereduaren eztabaidari zintzotasunez noiz helduko zain zaudelako, kaleak kuartel bihurtuko diren beldur, Gasteizen zein Donostian.