Ia 2.000 suhiltzaile ari dira Portugalen 62 hildako utzi dituen sutea itzaltzeko lanetan

Babes Zibilak emandako azken datuen arabera, ia 2.000 suhiltzaile ari dira Portugal erdialdean larunbatean piztu zen sua itzaltzeko lanetan. Oraindik ez daukate sua kontolpean, baina lanak bide onetik doazela azpimarratu dute. 62 pertsona hil eta beste hainbat zauritu dira dagoeneko.

NAIZ|LISBOA|2017/06/19 11:21|0 iruzkin
Portugal-fire
Hainbat herritar, suteari begira. (Miguel RIOPA/AFP)

2.000 suhiltzaile inguru daude lanean baina oraindik ez dute sutea kontrolpean hartu. Europar Batasuneko kideei laguntza eskatu die Portugalek.

Suak hiru barruti hartzen ditu: Leiria –hemen hasi zen sua larunbatean eta bertan daude suhiltzaile gehienak lanean–, Coimbra eta Castelo Branco, guztiak Portugal erdialdean kokatuak.

Sua oraindik ez dago kontrolpean baina, Babes Zibileko iturriek azaldu dutenez, bide onetik doaz lanak. Hala ere, ohartarazi dute baldintza meteorologikoen eraginez «zaila» dela suhiltzaileen lana. 

Azken datu ofizialen arabera, 62 pertsona hil dira eta beste hainbeste daude zaurituta, haietako bi egoera larrian daudenak. Hildakoen artean familia osoak daude, haietako asko suak errepidean harrapatuta utzitakoak.

Portugalgo lehen ministroak, Antonio Costak, igandean ohartarazi zuen litekeena dela hildakoen kopuruak gora egitea, sugarrek ezinezko egin dutelako oraindik zenbait zonaldetara iristea.

Goizean zehar Estatu espainoletik eta Italiatik bina hegazkin bidaliko dituzte eta Estatu frantsesetik baliabide gehiago iristea espero dute Portugalgo agintariek. Jasotako laguntza eskertu dute, baina ohartarazi dute oraindik laguntza behar dutela eta, horregatik, Europar Batasuneko herrialdeei eskatu diete suhiltzaileak bidal ditzatela. 

Poliziak uste duenez, tximista batek piztu zuen ziurrenik sua.

Haize indartsuak eta tenperatura altuek sugarrak azkar hedatzen lagundu zuten.