San Jose plaza “Sanferminak kantari” ekitaldiaren agertokia izan zen atzo berriz ere. Ehunka pertsona gerturatu ziren bertara eta hortik abiatuta Alde Zaharreko kaleak euskal doinuez bete zituzten.

Tradizioa bihurtu da jada topaketa hau, eta jendetza biltzen du urtero. Orreaga Fundazioak bultzatuta, Euskal Herriko zein kanpoko kantu taldeak etortzen dira urtero egun hau ospatzera. Goizeko hamabiak aldera, Mercaderes kaletik abiatu, eta kantuzaleek abesti herrikoiekin gozatzeko aukera izaten zuten. “Txoriak txori”, “Lepoan hartu”, “Itsasontzi baten” eta gisako euskal kanta ugarik berotu zuten giroa.

Kantu saioa amaitutakoan, bazkari jendetsua egin zuten, elkar ezagutzeko eta harremanak sendotzeko aukera ederra. Euskara indartzeko egiten den herri-ekimen honetara bertaratutakoak gustora oso gelditu ziren.