Azpeiti, Azkoiti, Errezil, Zestoa, Beizama, Aizarnazabal eta Bidania-Goiazko ordezkariak biltzen dituen Urola Erdiko Mankomunitateak bihar erabakiko du GHK erakundeak Lapatxeko Zabortegiaren gainean egindako eskariari zein erantzun eman.

Ohar batean azaldu zuenez, Mankomunitateak iazko azaroan aho batez erabaki zuen otsailetik aurrera Gipuzkoako gainerako herrietako zaborrik ez jasotzea, teknikarien arabera «horrela jarraituz gero Mankomunitateko udalerriek ezingo zutelako euren zaborra bertan isuri».

Zehaztu dutenez, GHK-k erabaki hori bertan behera uzteko eskatu dio idatziz Mankomunitateari, eta beste eskakizun batzuen artean, Gipuzkoa osoko zaborra jasotzen jarrai dezala eskatu dio.

Batzarkideek bihar erabaki beharko dute azaroan hartutako erabakiari eutsiko dioten edo gainerako gipuzkoarrek sortzen duten zaborra onartzen jarraituko duten, jakinda hiruzpalau hilabetean zabortegiak gainezka egingo duela, teknikari en txostenek ohartarazten dutenez.