Aitor Agirrebarrena Lizartzako presoaren senideek istripua izan dute Salamanca inguruan bisita egin ostean. Etxerat elkarteak atzo salatu zuenez, «senideek derrigorrean inposaturik euren bizitza-eskubidea gauzatzeko egin behar dituzten bidaia luzeen osteko urteko bosgarren ezbeharra da hau, hirugarrena hilabete honetan».

Mobilizazioak

Etxeratek prentsaurrekoa emango du bihar Donostian, sakabanaketa politikak dakartzan arriskuak salatzeko. Horrez gain, istripua salatzeko elkarretaratzeak egin zituzten atzo Gasteizen, Andre Maria Zuriaren plazan, eta Iruñean, PP alderdiaren egoitzaren aurrean. Bilbon gaur dute hitzordua, 19.00etan Arriaga plazan, eta Donostian biharko deitu dute elkarretaratzea, 19.00etan, Bulebarrean, udaletxe ondoan.