Roger Federer tenislari suitzarrak nagusitasun handiz bereganatu zuen atzo Rotterdameko ATP-500 torneoa, finalean Grigor Dimitrov bulgariarra bi set-etan (6-2 eta 6-2) eta ordubeteren azpitik (53 minutu) menderatuta. Bezperan, finalerdietara helduta, munduko rankingean lehen postura igotzea ziurtatu zuen, baina horrekin nahikoa ez eta atzo bere ibilbide arrakastatsuko 97. torneoa poltsikoratu zuen. 2012ko urritik ez zuen lortzen Federerrek lehen postura igotzea, eta orain, 36 urte eta 6 hilabeterekin, historiako zerrendaburu zaharrena bilakatu da. Beste lorpen bat suitzarrarentzat, eta ez da azkena izango.