Gosea hil ala biziko arazoa da herrialde askotan. Aurreko astean NBEk salatu zuen Somalian milioi bat lagunek lehortearen ondorioz beren etxea utzi behar izan zutela. Atzo, sei GKEk ohartarazi zuten 8 milioi haur gosez hiltzeko arriskuan daudela «aurrekaririk gabeko» gose krisiaren ondorioz. Nazioarteko komunitateari dei egin diote arreta jartzeko Afganistan, Yemen, Burkina Faso, Kongoko Errepublika Demokratikoa, Etiopia, Mali, Nigeria, Somalia eta Hego Sudanen gosetearen ondorio «suntsitzaileei». Irudian, GKE bat Kenya iparraldean osasun laguntza ematen.