Arantxa Tapia Ekonomiaren Garapen, Jasangarritasun eta Ingurumeneko sailburuak EAEko Kontingentzia Energetikoaren Plana aurkeztu zuen atzo Gasteizko Legebiltzarrean. Plan horrek «neguan hornidura ziurtatuta izateko, gasaren kontsumoa kudeatzea» du helburu.

«Europar Batasunean adostu da estatuek % 15 murriztea gas kontsumoa, eta espainiar Estatuko egoera bereziaren ondorioz, Estatu osoan % 7 izatea aurreztu beharrekoa», adierazi zuen Tapiak.

Helburu hori lortzeko, planak industria eremuan eragin handiagoa duten laguntza publikoak, programak eta neurriak biltzen ditu. Besteak beste, jarraibide bat dago Administrazioan telelana sustatzeko, trenbide garraioa bultzatzeko, ibilgailuen parkea berritzeko eta industrialdeetan energia iturri berriztagarriak garatzeko.

Herritarrei dagokienez, dokumentuak eraginkortasun energetikoari buruzko planak jasotzen ditu, eta «sentsibilizazio eta dibulgazio konpromisoak» proposatu. Gainera, EAEren «eskumen eremutik kanpoko neurri potentzial» batzuk biltzen ditu; besteak beste, eskari elektrikoaren kudeaketan parte hartuko duen «agregatzailearen» figura.

Oposizioaren erantzuna

Lakuaren dokumentuak oposizioko talde gehienen kritikak jaso zituen; izan ere, EH Bilduk dioenez, arazoak daude metodologian, edukietan eta sekuentzian. «Metodologia parte-hartzailea saldu nahi da, eta ez gaude ados», adierazi zuen Mikel Otero parlamentario subiranistak, eta eragile ekonomikoekin bilerak egin direla nabarmendu zuen, «talde politikoak alde batera utzita».

Edukiei dagokienez, «hainbat arazo» daudela ohartarazi zuen. «Zaila da plangintza bat ikustea. Izan ere, ez dago argi hori plan bat den ala ez», gaineratu zuen, nabarmendu aurretik epe laburreko neurriak hartu behar direla, ez epe luzeko aholkuak. «Gobernuak egiten dituen gauzei buruzko 60 orrialde planteatzen dituzte, baina xehetasunetara goazenean, udalekin eta aldundiekin adostuko den instrukzio bati buruz ari gara, funtsean».

Elkarrekin Podemos-IUtik, David Sotok salatu zuen bere taldeak ez duela erantzunik jaso Lakuara bidalitako ekarpenez, eta zalantza agertu zuen etxebizitzetan hidrogenoaren erabilera bultzatzeko ideiaren inguruan. «Ez zaigu egokia iruditzen, bide egokitzat jotzen ez duten adituak entzun baititugu».

PPko Muriel Larrea, berriz, Lakuaren planaren alde agertu zen. «Kontingentzia Planak gizarte gisa izan beharko genituzkeen baldintzak» betetzen dituela adierazi zuen, familia kalteberek negu honetan pobrezia energetikoa «askoz gehiago sufritzea» gerta daitekeela ohartarazi aurretik.

Gaztela eta Leonek Garoña irekitzeko aukera aztertu nahi du

Gaztela eta Leongo Juntako presidenteordeak, Juan Garcia-Gallardo ultraeskuindarrak, Garoñako zentral nuklearra berriro irekitzeko aukera aztertzeko bideragarritasun azterlan baten lizitazioa iragarri zuen. Garoñak 2012ko abenduan utzi zion elektrizitatea ekoizteari, eta gaur egun eraisteko fasean dago.

Voxen karguak bi erreaktore berri jarri nahi ditu plantan, eta, bere ustez, 2030ean berriro martxan egon liteke, «borondate politiko nahikoa» izanez gero. «Egia da ez dela erraza eta ingurumenaren, teknikaren, ekonomiaren eta gizarte eraginaren arloko azterlan guztiak eskatuko dituela, baina ondorengo belaunaldietan ere pentsatu behar dugu».

Nuclenor enpresak, zentralaren jabeak, asteartean adierazi zuen ez duela Garoña berriro irekitzea aurreikusi. «Kostu oso handiak eta eskatutako epeak» argudiatu zituen aukera hori alboratzeko.GARA