Eraginek, Bilboko gazte prekarizatuen asanbladak, bere jardunari amaiera ematea erabaki du sei urteko ibilbidearen ostean, «ziklo bat betetzat» emanda. Oraingo «testuinguru zailean», gazte antolakuntza forma berriak «birpentsatu» eta «batasunetik etorkizun duina irabaztea ezinbestekoa» dela azpimarratu zuen atzo plataformak.

2016an jaio zen, krisialdi ekonomikoaren testuinguruan gazteriak bizi duen prekarizazioari aurre egiteko. Bilbon jarduera ekonomikoa aldatu izanak «lanaren atomizazioa eta borrokarako gaitasunaren galera» ekarri zuela ohartarazi zuen, eta «gazteek beraien eskubideen alde ideologizatzeko eta borrokatzeko espazio izateko» xedez sortu zen.

Besteak beste, BBK Live jaialdiko langileen baldintza prekarioen kontra egin dute protesta, baita apustu etxeen aurka ere.