Larunbatean ehundik gora lagun atera ziren karrikara Saran, 945.000 euroan salgai den etxearen salmenta salatzeko. Presioaren ondorioz, eraikinaren jabea manifestariekin bildu zen salneurria 720.000 eurora apaltzea onartu duela jakinarazteko. Alta, diru kopuru hori handiegia da, elkarretaratzearen antolatzaileen ustez, etxea dagoen lurra duela urtebete 140.000 euroan erosi baitzen eta eraikitzeko kostua ez baita 300.000 euro baino gehiago izan. Espekulatzaile lotsagabeen aurrean gero eta herritar gehiago oldartzen ari dira Ipar Euskal Herrian.