Etxebizitzaren prezioaren indizea nabarmen hazi zen 2022an Hego Euskal Herrian, 2007tik izan den igoerarik handiena, Estatistika Institutu espainolak (INE) atzo argitaratutako datuen arabera.

Araban, Bizkaian eta Gipuzkoan %6,4 garestitu zen batez beste; 2018an %5,4ko igoera izan zenetik aldakuntzarik handiena da. Nafarroan, aldiz, %7,3koa izan da igoera; azken urteotako aldaketarik handiena 2019an gertatu zen, indizea batez beste %3,8 igo zenean.

Etxebizitza motari begiratuta, berrien prezioaren indizea %6,8 inguru hazi zen iaz; bigarren eskukoena, aldiz, %7,4 hazi zen Nafarroan, eta %6,3 gainerako hiru herrialdeetan. Bestalde, iazko laugarren hiruhilekoan EAEko etxebizitzaren prezioa %1,6 merkatu zen. Nafarroan, aldiz, %0,7 garestitu zen, Estatu espainoleko bigarren igoerarik handiena.