Migrazio krisiak eta etorkinen aurkako politikek urtean zehar hamaika argazki uzten dituzte. Asko eta asko lazgarriak dira, eta baten batzuk, itxaropenaren ateak zabalik marrazten dituztenak. Goiko hau, itxuraz, ez da ez bata ez bestea. AEBen eta Mexikoren arteko muga harresidunaren alboan jasotakoa da. Peluxeak bere laguna galdu du; honek ez zuen bidean utzi nahiko, seguru, baina izuaren eta presaren lanak dira. Tristea da hartzatxoaren irudia paraje horretan. Eta are tristeagoa izango zen, seguru, aurrera joandako haurraren begitartea, galeraz ohartutakoan.