Ehunka aurkeztu zuten atzo, Bilbo Zaharra, San Frantzisko eta Zabalako sare komunitarioa. Urtarrilean birfundatu ostean, hilabeteotan Gorte kaleko Telefonicaren eraikinari erabilera komunitarioa emateko ondu duten proposamena aurkeztu zuten. Azaldu zutenez, auzoek «pobrezia eta gizarte bazterkeria arazo larriak dituzte» eta haiei aurre egiteko «esku hartze publiko eta sozial integralak» behar dira. «Komunitatearen beraren parte hartzea ezinbestekoa» dela adierazi zuten eta, horretarako, Telefonicaren eraikina baliabide aproposa dela uste dute.