Gipuzkoako Foru Aldundiak omenaldia egin zion atzo arratsaldean Lazkaoko Beneditarren Artxiboaren sortzailea den Juan Joxe Agirre Begiristain (Alegia, 1930) fraide eta artxibozainari, Lazkaoko beneditarren elizan egindako ekitaldi hunkigarrian. Duela mende erdi sortzen hasi zen Lazkaoko Beneditarren Artxiboa, eta gaur egun, besteak beste, 80.000 kartel, 35.000 pegatina, 8.000 aldizkari, 150etik gora bilduma dokumental eta dohaintzan jasotako 70 artxibo bildu ditu. Euskal historia garaikidea ezagutzeko ezinbesteko funtsa bilakatu da.