Eskuin muturrak estatu garrantzitsuak gobernatzen ditu, herrialde askotako armada eta polizia-indarretan pisu nabarmena du eta bere ideologia euskal jendartean lehen ez bezala barneratzen hasi da. Fenomeno horren aurrean, Pobreziaren eta Bazterkeriaren aurkako Nazioarteko Egunaren harira, Donostiako Zero Pobrezia plataformak ekimen ikusgarria egin zuen atzo, Donostiako Kontxako pasealekuan, «herritarrei ohartarazteko eskuin muturrak sortzen duen gorroto diskurtsoan erortzeko arriskua hor dagoela».