Gordelekutik ateratzean, bere itzala ikusita, izutu eta berriz ezkutatu da Phil marmota; hortaz, negua ohi baino gehiago luzatuko da Estatu Batuetan. Munduko marmota ezagunenak urteroko iragarpena egin zuen atzo Punxsutawneyn, Pennsylvanian, Marmotaren Egunean, milaka lagunen aurrean. Aspalditik dator tradizio hau: ezagutzen den lehen zeremonia 1887an izan bazen ere, festa lehenagotik datorrela pentsatzen da, kristautasunaren aurrekoa dela. Phil, berez, ez da iragarle bikaina, %40ko asmatze tasa baitauka.