«Oles oles, lurra esna zaitez» kantatuko dute batzuek; «Santa Ageda bezpera dugu / Euskal Herriko eguna», besteek. Makila eskuan zutela eta «eztarriz sano» ibili ziren atzo, Santa Ageda egunaren bezperan, Euskal Herriko hamaika txokotan eskean, «ohitura berritzeko asmoz», zoriona zabalduz oles egiten. Lurra negu hotzetik esnatzeko makilarekin jo ohi da zorua, izan berdegune, izan asfalto. Eta barruak esnatzeko, berriz, kopla kantuan ibili ziren etxerik etxe, ohitura zaharrak berritzeko belaunaldiartekotasuna sustatzen eta elkar entzuten.